Ka Dorbar Shnong jong ka Elaka Saitsohpen Sirdarship ha ryngkat ka jingsynran lang ka Seng Hynniewtrep National Youth Front, South East Sohra Circle ha ka 22 tarik Kyllalyngkot 2026 ka la wan ban kynduh ia u Registrar ka National Institute of Technology (NIT) kaba don ha Saitsohpen Sohra haba iadei bad ka jingiaid lait ka North East Security Service Agency ha ka Shnong Saitsohpen. Haba kren sha ki lad pathai khubor na ka liang u Sirdar ka Elaka Saitsohpen Sirdarship u Dawningstar Kynta u la ong ka Shnong Saitsohpen ka la wan ban kynduh ia u Registrar hadien ka jingiaid lait ka North East Security Service Agency na ka Shnong bad ka jingioh ban treikam khlem ka NOC na ka Shnong. Nalor kata u la ong ba katkum ka jingbthah ka District Council ia ki Shnong shwa ban ai NOC dei ban mynjur shwa da ka Dorbar Shnong khamtam ia ki nongwei (Non Tribal).
Shuh shuh u la ong ha ka jylla ki don ki agency kiba lah ban trei kiba don ia ka license ki dei ban plie lad shwa ia ki jaitbynriew Khasi bad lada wan kiwei kiba nabar ki wanrah da ki briew lajong kane ka plie lad noh ia kiwei ki jaitbynriew bad lada kiwei ki jaitbynriew kim iatreilang bad ka shnong ka wanrah jingeh ia ki nongshong shnong ka thaiñ Sohra bad lada ioh para Khasi dang ia sngewthuh ban iakren ia ka ktien ka thylliej bad ka wanrah jingmyntoi ia ka shnong Sohra baroh kawei kumjuh ruh ia ka jaitbynriew Hynniewtrep baroh kawei.
U Sirdar u la ong kane ka jingleh ka North East Security Service Agency ka pyni ba kam burom ia ka riti dustur ka shnong bad kam khein snep ia ka shnong bad ka shu wan thombor bad hapoh u pud u sam ka shnong dei ban burom bad dei ban wan da ka lynti haba ki donkam ia ka NOC.
Shuh shuh u Sirdar u la ong ha ka jingkynduh bad u Registrar ka NIT kane ka long kaba bakla lut nadong shadong khamtam hadien ba kane ka NESS ka khlem shim ia ka NOC na ka shnong bad ka jingpan pisa na ki nongtrei 15,000 hajar, 20,000 hajar kane ka long pynban ka jingleh business ia ka kam jong ki briew bad na ka liang ka shnong kam lah ban pdiang ia kane ka jingleh kane ka North East Security Service agency.
Na ka liang ka Dorbar Shnong Elaka Saitsohpen kan iai buddien ia kane ka kam kumba ka Seng HNYF South East Sohra Circle ka aipor 1 bnai ia kane ka NESS Agency ba kan weng noh ialade hadien ba kam shym iaid katkum ka riti treikam jong ka Shnong. Khatduh ka Dorbar Shnong Elaka Saitsohpen Sirdarship ka kyntu bad ka dawa na ka NIT ba ka dei ban khot tender biang ia kam ba kan long khuid long suba bad kaba biang ha ki kot ki sla khnang ba kan nym jia shuh hadien habud.
