Ha ka 26 tarik mynta u bnai kata hadien ka Khrismas, ka Kong Anjela Rngad ryngkat bad ka kynhun Thma u Rangli (TUR) ki la leit ban buh da ka Ejajar (FIR) pyrshah ia u Akash Sagar uba la leit ban rung ban shna ruh ia ka video da kaba pyrta ruh ‘Jai Sreeram’ bad rwai ki jingrwai jong ka niam Hindu ha ka ïingmane Epiphany CNI Church kaba don ha shnong Mawlynnong, East Khasi Hills.
Hadien katei ka video ba la saphriang sted bha ha ki rynsan Social media khamtam ha ka account jong u ha Instagram, la mih bun ki jingkynthoh bad ki jingkdew kti hynrei kaba sngewsih ka long ba ka jingpyrshah jong kiba bun ki Khristan ha kylleng ki Jylla ha India ka kylla long pynban ka jingpynkiew sted ia ka jingbun kiba peit ia katei ka video. Kawei ruh kaba pyndiaw ia kiba bun ka long ba haduh mynta katei ka video jong u Akash ka dang don ha ka account jong u. Kumta ki paidbah ki la sah lyngngoh kumno ba ka Ejajar kaba la buh naduh 26 tarik Nohprah kam pat treikam haduh mynta.
Hadien ka jingïakynduh bad u Bah Paul Lyngdoh, Myntri Arts and Culture ka jylla, u la jubab khyndiat halor ka jingiadei bad kane ka bynta “ka long kaei kaei kaba sngewsaitmet ba kum kine kiei kiei ba ki briew ki pynjngut ia ka suk ka saiñ ka Ri jong ngi. Na ka liang jong nga, nga pynrem ruh ia ka jingthmu ban pynkylla jaka leh niam ha Mawsynram. Ngi khmih lynti ruh ba ki kynhun Balang ki dei ban nym shah pathar ban rung ha ki jaka mane jong ki”. U la ban jur ruh ba kane ka ishu kam don jingiadei ei ei bad ka Sorkar namar ka jingwan tuid ki bar jylla ha kane ka Jylla ka Sorkar Jylla kan shim khia, kata na ka bynta ban kyntiew ia ka jngohkai bad ka jingshngaiñ ki paidbah hynrei ki shnong bad ki Balang kidei ban shim ia ka ki jingkit khlieh ba kum kine kin ym jia, u la kdew ruh ba kine kidei tang ka jingleh shit niam bad ka jingpyrshah ia ki riew ngeit Khristan. U la pyntikna ruh ba ka DGP jong ka Jylla ka la dep ban ioh lum jingtip halor jong une u briew bad u la ong ruh ba ka aiñ kan kan shim ia ka kamram ban pyndep.