Ka Kong Ampareen Lyngdoh kaba dei kawei na ki Myntri Sorkar kaba la paw bha bad don ha kti ha Kjat jong u MR mynta khyndiat snem bad lah ban ong ba kadei kawei na ki Myntri Kynthei kaba kham shemphang bad kumba la ai na ka Kyrdan bad ka shuki ba la pynkhamti da u Myntri Rangbah ka jylla Conrad K. Sangma hadien ba ka NPP ka la ioh ia ka bor ban synshar biang ha ka Sorkar lyngba ka jingjop don burom ha ka elekshon 2023. Kane ka rai jong u MR ka la pynshaiong ia kiba bun ha kaba u la thep bujli noh da kiwei ki Myntri kiba kynthup 4 ngut na NPP bad 4 ngut na kiwei ki Party Synrop. U Bah Metbah Lyngdoh uba dei uwei na ki Myntri ha u snem ba u MR u dang long thymmai ha ka kam, u la shah jied biang ban wanphai kum u Myntri mynta u snem da kaba kylliang noh da u Bah Paul Lyngdoh na ka UDP.
Ki 8 ngut ki MLA ba la pynbam smai ha kane ka sngi ki long u Bah Sosthenes Sohtun (NPP), Timothy Shira (NPP), Bah Wailadmiki Shylla (NPP), Berning Sangma (NPP), Bah Metbah Lyngdoh (UDP), Bah Sanbor Shullai (BJP), Bah Lahkmen Rymbui (UDP) bad Bah Methodeous Dkhar.
Ha kane ka sngi ba la pynbam smai da u Lat ka Jylla, u C. H. Vijayashankar, ka Kong Ampareen Lyngdoh bad u Bah Paul Lyngdoh ki khlem poi ha kane ka sngi ba kyrpang hynrei kaba phylla ka long ba u Bah Ardent Miller Basaiawmoit na ka party Voice of the People’s Party uba dei ruh uwei na ki Nongïalam ka Liang pyrshah, u la wan ban sakhi ha kane ka sngi.
Hadien kane ka jingpynbamsmai bun ki Myntri barim ki la diaw hynrei na ka liang u Bah Shakliar Wajri Myntri barim ba khmih ia ka Tnad Labour, Employment and Skill development, Registration & Stamps, Tnad Ïalehkai (Meghalaya Sports and Youth Affairs) u la ai Khublei ia u Myntri Rangbah ka Jylla uba la ai ia katei ka kabu bad ia ki paidbah kiba la shaniah ia u ha kine ki snem ba lah leit “Ka long ka burom bad ka jingsngewsarong ban long u Myntri uba khynnah tam ha ka Jylla ban bat ia kane ka kam bad ka jingkitkhlieh. Nga la ai ia kaba bha tam ban nongsynniang da ka hok bad ka jingbeit. Ngan iaineh ban treihok na ka bynta ka jingbit jingbiang u Paidbah ha ka Jylla” la ong u bah Shakliar.
