U Lat jong ka Jylla Meghalaya u Satya Pal Malik ula pynpaw ba haduh kine ka por ba mynta ruh ka ri India kam pat niew kor ïa ka jingnang jingstad ne ïa ka tnad pule puthi, namar ba kumba long mynta ka India ka dang mang tang kumba 6 % na ka jingmang tyngka jong ka Ri ban pyntreikam ha ka liang ka pule puthi hapoh ka ri.
Ïa kane u Lat ka Jylla ula kren ha ka jingplie paidbah ïa kawei ïing skul bad kawei ka ïing College jong ka Shri. Kanchi Kamakoti Vidya Bharati Vidyalaya kaba don ha Mawbah, Barapathar, Shillong.
U Lat ula pynpaw shuh shuh da kaba ong haba ïanujor bad ki skulbah kiba don ha USA bad ha UK ki don da ki spah tylli ki Nobel Peace Prizes katba ha ri India ki dong tang 12 tylli.
U ong ba ka jingsahdien jong ka pule puthi hapoh ka ri India ka dei na ka jingduna palat ka jingshim khia na ki bor ba dei peit. Ula ong ruh ka jingpynkupbor ia kano kano ka imlang ka sahlang ka dei tang lyngba ka jingnang jingstad.
Kumta na ka liang u Lat ula ïaroh eh ïa ka Kanchi Kamakoti Shankara Health, Education bad ka Charitable Trust jong ka, kaba la shim khia naduh na tynrai ban pynphriang ïa ka jingnang jingstad hapoh ka jylla.
Ïa kane ka ïing skul thymmai la shna ha ka jaka ba la noh synniang da kiba ha ïing jong ka jait Geonka kiba sah ha Shillong, kaba la sdang ia ka jingaihikai ruh haduh ka klas ba 10 naduh u snem 2004. Ia kane ka ïing la shna da ka Kanchi Kamakoti Shankara Health, Education and Charitable Trust katba ïa ka jingpynïaid ba man la ka sngi jong ka skul la leh da ka Purvottar Janajati Shiksha Samiti and Meghalaya Shiksha Smiti.
Ha kane ka jingïalang la ïadonlang ruh u MLA ka thaiñ u bah R. Rapsang bad ula noh synniang ruh haduh T.15 lak sha ki jingdonkam jong ka skul kum ki ben ki des bad kiwei de. Katba na ka liang jong u Pralad Toor uwei na ki nongkhaï bad u nongtreimon sngewbha ula noh synniang da ka jaka kaba heh haduh 30 biga naka bynta ban shna ïa ka skul ha Nongpoh.
Kiwei de kiba kren ha kane ka jingïalang ki kynthup ïa u Dr. Nalin Mehta, Director NEIGRIHMS bad ka Padmashree kong Patricia Mukhim kaba long ka Guests of Honour. (MIPR)