Ka kynhun jong ki Nongdie madan hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) ki la pynpaw ia ka jingbitar bad ka jingpyrshah halor ka jingleh shiliang ka Sorkar bad ki bor pulit da kaba ailad ia ki kali ban iaid lyngba na Khyndai-Lad (PB) sha lad Umsohsun – Them Bijoy katba ia ki nongdie madan ki kyndang na ka por sha ka por ban die jingdie na katei ka lynti.
Haba ioh ban iakren bad kitei ki nongdie madan ki la ong “kumno ka Sorkar ka aidaw ba ki thmu ban weng jubor ia ngi nangne namar ba khapngiah ka lynti iaid katba ban iaid kali katba mon ki ailad. Ngi iohi ki kali kiba iaid nangne kynthup na Assam bad kaba pynlong ruh ia ka jingkhapngiah kaba arshah hynrei ia ngi kiba im ja nangne ki beh man ka por”.
Kum ban shu pynkynmaw ba ka Sorkar Jylla lyngba u Myntri ba khmih ia ka tnad Social Welfare, Bah Paul Lyngdoh ki la pynmih hukum na ka por sha ka por ba kin pynkynriah noh ia baroh ki nongdie madan sha kawei pat ka jaka na ka bynta ban wanrah ia ka jingitynnad bad ka jingkylluid ha ka Nongbah. Ha ka 24 tarik Naiwieng 2024, u Bah Paul u la pynmih da ka jingpyntip ba kin weng noh ia baroh ki nongdie madan naduh katei ka tarik bad yn ym shah shuh iano iano ban die jingdie khlem ioh jingbit.
Lyngba katei ka jingpyntip, ki dkhot ka MGSPHSVA ki la pynlong ruh ia ka jingiakhih ha utei u juh u bnai bad watla kane ka aiñ ka khlem pat treikam, ki nongdie madan haduh mynta ki dang don ha ka jingsyier bad ka jingbitar ha kajuh ka por ba leh shilliang khmat ki bor ba halor.