Kum shibynta na ka prokram jong ka Assam Rifles’ National Integration Tour (NIT), ka ba don la ka jingthmu ban wanrah ia ka jingiatylli hapdeng ki khun samla bad pynioh ruh ha ki ia ka jingtip shaphang ka jingriewspah ki matti jong ki mynbarim bad ruh ban pynsngewthuh shaphang ka roi ka par, 24 ngut ki khynnah kynthei na ka District Mon jong ka jylla Nagaland ha ryngkat bad ki nongialam jong ki, ki la wan ban ia kynduh ia u Lat ka Jylla u Phagu Chauhan ha Raj Bhavan, Shillong hynin ka sngi.
Ha ka jingiakynduh na ka liang jong u Lat ka Jylla ula ioh ban ai ki kyntien sneng kyntien kraw ia kine ki samla, u ong ba u don ka jingkyrmen ba lyngba ki samla jong ka ri lah ban wanrah ia ka jingiatylli para nongshong shnong hapoh ka ri India baroh kawei. U la pynshlur ruh ia ki ba kin trei shitom ban kynjoh ia ka jingangnud jong ki ha ka liang ka pule puthi ruh.
Kane ka kynhun NIT kala poi ha nongbah Shillong naduh ka 13 tarik mynta u bnai bad kin sa mih noh ha ka 17 tarik mynta hi u bnai. Lyngba kane ka jingwan jngoh jong ki ia ka Jylla Meghalaya kila ioh shibun ki lad ban tip shaphang ka kolshor bad ki matti jong u mynbarim, kila ioh jingtip ruh shaphang ki kam pynroi ba bun jait kumjuh ki kam Industri kiba treikam hapoh ka Jylla.
