Ka Hynñiewtrep Youth Development Council (HYDC) Sengkmie hapoh ka jingialam u Bah Wyraiwan Sohtun President ha ka 25 tarik Kyllalyngkot, 2025 ka la leit ban tah ia ki kopi ba la pynmih da ka Department of Labour, Employment and Skill Development, Government of Meghalaya ha ka 14 tarik u January, 2025, kum shi bynta ban pyntreikam ia ka dor bai bylla sngi na ka bynta kiba hap ha ki kyrdan Unskilled, Semi-Skilled, Skilled bad Highly Skilled.
Kane ka jingleit tah ia kane ka copy jingpynbna la dep ban tah ha kylleng ka nongbah Shillong bad kumjuh ha ki bynta jong ka khap sor bad hynne ka sngi na ka liang ka Seng ka la leit ban tah ia kane ka jingpynbna ban pynkiew nong Bai bylla sngi sha ki karkhana kiba don hapoh Umiam kynthup ia ki karkhana, ki petrol pump ki Ophis shimet ki company bad kiwei kiwei.
Na ka liang ka Seng ka la ioh ruh ban kynduh ia ki trai Jylla kiba trei ha kine ki company shimet bad lap ruh ba bun na ki, ki dei ki nongtrei bar Jylla bad ka Seng ka la ioh ruh ka jingujor na ki trai muluk kiba trei ha ki karkhana bapher bad ki lap ba ka bainong ba ki ioh kam iahap bad ka kam ba ki trei.
Katkum ka Notification la kdew ba ki unskilled worker la pynkiew na ka 419 tyngka sha ka 525 tyngka, ki semi-skilled worker pat na ka 474 tyngka sha ka 565 tyngka, ki skilled worker na ka 530 tyngka sha ka 605 tyngka bad ïa ki highly skilled worker na ka 586 tyngka sha ka 645 tyngka.
Na ka liang u President u Bah Wanroy Sohtun, haba kren sha ki lad pathai khubor u la ong ka Seng hadien ba wan jurip ia kine ki karkhana bapher bapher kiba don ha Umiam bad na ka liang ka Seng ka lap ba bun kim pyntreikam ia ki dor ba ka sorkar ka pyntreikam bad ka lap ruh ba ka dor ba ai bainong ia ki nongtrei kam iahap satia bad ka dor kaba ka sorkar ka lah buh bad na ka liang ka Seng kan sa leit jurip shuh shuh sha kiwei ki jaka bad kan sa ai jingthoh sha ka sorkar lada kine ki company bar Jylla kim pyntreikam ia ka kaei kaba ka sorkar ka la buh ia ka dor bai bylla sngi na ka liang ka Seng kan sa phah khang khyrdep noh bad pynduh noh ia ki licence jong kine ki karkhana ki bym kohnguh ban pyntreikam katkum ka bhah ba ka sorkar ka la buh.
