Ka Dorbar ki Waheh Kur Ri Jaiñtia, kaba la thrang ba ki Kur ki Jait kiba la seng kiba don ha Ri Jaiñtia, dei ban ithuh noh da ka Aiñ 6 Schedule ka JHADC, kumba la aibor da ka riti treikam ka Ri India, ka la kyntu ia baroh ki Kur kiba shim ia ka Kur ka Jait jong ka kmie ha Ri Jaiñtia, kiba ym pat dep ban pynrung ia ki Kur ki jong ki katkum ba la khot da ka Secretary ka Executive Committee ka JHADC, na ka bynta ban pynkloi noh ban leit pynrung ia ki Kur ki jong ki katba dang don ka por, da kaba leh kumta na ka bynta ba ka Executive Committee hapoh ha ka jinglam khmat u ma Thombor Shiwat kum u CEM JHADC, ba un thaw Aiñ na ka bynta ki Kur ki Jait, ki Nongkitkam bad ki Dorbar / Seiñ Kur hapoh u pud ka JHADC.
Ha ka jingiadei bad kane ka jingthmu ka JHADC ban ithuh ia ki Kur, ka Dorbar ki Waheh Kur Ri Jaiñtia, ka khot ia baroh ki President / Chairman, ki General Secretary, ki Nongkitkam jong ki Dorbar / Seiñ Kur bad kiwei, ban wan ia shimbynta ha ka Executive Dorbar ka ban sa long ha ka 02/11/2024 ha ka por 11:00 mynstep ha Hall (Yung Walieh) ka Chilliang Raij Jowai.
Ha kane ka Executive Dorbar yn ia kren bniah bha ha ka jingiadei bad kane ka phang, kaba kum ka kam iap kam im jong ka jait bynriew kaba shim ia ka Kur ka Jait jong ka kmie.