Ka jingduk bad jingkyrduh ka la nang ring sdot ia ka Jylla baieit jong ngi namar ka jingtlot palat ka Sorkar hapoh Meghalaya naduh ka Sorkar ba mynshwa haduh kaba mynta ban wad ki lad ki lynti ban thaw ki Job Policy ia ki samla jong ngi.
Ka jingkharoi ki jingsniew ruh ka long ka jingbym khein snep ia ki samla kiba la duh jingkyrmen na ka jingbym biang ki nongsynshar ia ka Jylla jong ngi.
Halor kane ka Seng FKJGP Sengkmie ka la pyrta man ki por sha ki tyndong shkor ki nongialam ka Sorkar hynrei ki leh bym suidniew ia kane,hynrei imat ka la dei ka por ban thad madan ban dawa jur ia ka Sorkar da ka iaid rally ban pynbor ia ki nongmihkhmat ban trei hok ia ka paidbah kiba la pynjop donburom ia ki ym ban kamai spah pynban da ka hok jong ki paidbah kiba la kylla duk man la ka sngi.
Kumta na ka liang ka tnad treikam jong kane ka Seng hapoh East Jaintia Hills District Khliehriat kaba la tip kum ka FKJGP East Jaintia Hills District Khliehriat kan mih madan lang ha kane ka sngi ban dawa ia ka Sorkar ban leh ei ei na ka bynta ki samla baieit jong ngi kiba la pyndep ia ki jingpule ha ki lain ba pher bapher.
Khnang ban seisoh ka jingdawa da ka jingiaid paidbah (Public Rally) ka Seng ka khot ia ki samla pule napoh ka District ban ia kyrshan met bad mynsiem ia kane ka mat ym ban shu ia sngap jar namar ka dei ka hok jong ngi lang ban dawa khnang ba kan long kum ka jingkyrsiewthiah ia ki nongmihkhmat ba ioh thiah lyngai ha ki jingkynoi ka jingthiah ki palong ka jingbamsap bad ka jinglehbein ia ki samla ka Jylla jong ngi.
Ka Seng ka da sngewkhia eh ia kane bad da ka jingkyrpad ia ki samla kiba kwah ban ia snohkti lang ka Seng ka khot ia ki samla ban iawan sha kane ka rally ka ban pynlong da ka Seng ha ka 28/10/22 da kaba sdang ia ka jingiaid paidbah naduh Motphran haduh Madan Iewrynghep (Fire Brigade) ia kaba yn sdang naduh 11:00 baje mynstep.
Te khnang ban iaid beit bad iaid ryntih ban pynsuk ka Seng ka kyntu kino kino ki samla kiba don jingthmu ban leit sha kane ka jingiaid paitbah hapoh Sor Shillong na ka liang ka Seng FKJGP East Jaintia Hills District Khliehriat ka kyntu ba phin ai jingtip sha ka Seng ha kine ki number phone harum 60005 05549/70056 66928 khnang ba ka Seng kan ioh ban pynkhreh ia ki bus ban leit shaw ia phi ha ka jaka ba ngin sa pynbeit shen ong ka kyrwoh na u General Secretary ka Seng Bah D.H Sumer.