Ka Jaiñtia Coordination Committee for Reservation Policy (JCCRP), mynta ka sngi 18.08.2023 ha ka jingai khubor sha ki lad pathai khubor lynngba u Chairman u samla Jeshom Shylla uba long ruh u President JSU ha ka jingiadonlang u Secretary ma Sambormi Lyngdoh uba long ruh u President ka JNC, Joint samla O. M. Tariang uba long u President ka JYF, ki la khot bad wer ia baroh ki nongshong shnong ka ri lum Jaintia naduh ki riew shem phang, ki nonghikai skul bad college bad kiwei na ka bynta ban ia ai jingmut lang ha kane ka dorbar sha ka jingialang bah haka jingiadei bad ka Reservation Policy ka ban long ha sor Jowai ha 9 tarik une u bnai ban wan.
Na ka liang u Chairman ka JCCRP, u la ong ba hadien ki jingiakhih bajai bajai kiba la pynlong ha ki jaka bapher bapher jong ka ri Lum Khasi Jaintia, ha kaba na ka laing ka sorkar ka la kular ruh ban thaw ia ka Exper Committee ha ka jingiadei ban pynbeit ne pynkylla ia ka Reservation Policy kaba long kaba la rim palat, ha kaba ka Committee ka la shim biang ia ka rai ban khot ia ka dorbar bah ha nongbah Jowai, ha kaba ka JCCRP ka la khot lang naduh ki paidbah ka ri lum Jaintia, ki riew shem phang, ki nonghikai skul bad college bad kiwei na ka bynta ban ia ai jingmut lang ha kane ka dorbar.
Na ka liang u Secretary ka JCCRP u la kyntu bad ban jur ia ki paidbah ban wan sha kane ka dorbar kaba donkam na ka bynta ka jaitbynriew, ha kaba ka sorkar ka la pdiang ban pynthymmai ne shna ia kane ka Reservation Policy kaba noh shilliang haduh katta katta na ka bynta ki Khasi bad Jaintia, kumta kane ka dei ka kabu bah ia ki padibah baroh ban ioh ia phylliew jingmut lang ha kane ka dorbar.