Ka Jowai Municipal Board, Jowai lyngba ka Chief Executive Officer (CEO) ka la pyntip paidbah halor ki jingmyntoi ba bun jait jong ka Skhim NAMASTE bad ka la pynshlur ia baroh ki nonglum jaboh bad ki nongtrei kum nongpynkhuid jaboh ba ki lah ban pynrung kyrteng ha ka skhim sorkar ba la tip kum ka NAMASTE.
Ka National Action for Mechanized Sanitation Ecosystem (NAMASTE) ka dei ka skhim sorkar ba la sdang da ka Ministry of Social Justice and Empowerment ha ryngkat ka Ministry of Housing and Urban Affairs bad ka Ministry of Panchayat Raj da ka jingthmu ban pynkupbor ia ki nongpynlum jaboh bad ki nongpynkhuid kum ia ki Septic Tank bad kiwei da kaba pynioh ia ki da ki ID card, ki tiar PPE, ka jingïada ha ka imlang sahlang, ka jingpynioh pisa, ki jingmyntoi ha ka koit ka khiah, bad ka jinghikai ban pynbha ïa ka jingtbit jong ki. Ka skhim ka plie ruh ia ki nongtrei kiba trei ia ki kam pynkhuid jaboh kum ka jinglum jaboh ha ki surok, ki jaka pynkynriah, ki jaka bret jaboh.
Ban ioh ia kane ka skhim ki dei ban trei ia kane ka kam ym duna ia ka 6 bnai bad ka rta ym duna ia ka 18 snem. Ki donkam ban pynbiang ia ki kot ki sla ba pynshisha kum ki ID sorkar kiba kynthup ia ka Aadhaar Card, ka Ration Card, ka Voter ID Card, ka Pan card, ka Driving License, ka E-Shram card, ka BPL card, ka Labour card, ka mobile phone kaba la pyniasoh bad u Aadhaar jong ki.
Ka skhim ka kynthup nalor ka jingai ia ki tiar ki tar ba donkam ryngkat ki ID, ka ai jingiarap ruh da ka pisa kum ka ram (Loan) kaba kot haduh 5 lak tyngka.
Ki riew shimet kiba kwah ban apply ia kane ka skhim ki lah ban leit mih sha ka ophis jong ka Jowai Municipal Board kaba don ha Khimusniang hajan ka ophis jong ka PHE. Na ka bynta ki jingtip ba kham bniah lah ruh ban phone ha une u number 9863024731/9774977922.