Ki nongialam ka seng JSU sengkmie mynta ka sngi ki la shong ia ka jingialang ba kyrkieh hapoh ka ophis treikam ka seng ha Jowai bad ki la pynpaw ia ka jingsngew khia kaba jur hadien ka jingbymlah shuh ka sorkar bad ka tnat Jowai Municipal Board ban pynioh ia ka jaka ban bret iaki ñiut kiba la lum thup la bun taiew mynta ha baroh ki iew ha Jowai.
Ki nongialam ki la pynpaw ba ka seng kam lah ban shu sngap jar bad peit kai ha ba ki thaiñ bad ki paitbah ki jingshem jingeh na ka jingkynton ki ñiut ha ki jaka paidbah. Ka seng ka khot ka wer lang ia baroh ki paitbah jong ka ri lum Jaiñtia bad ka kyntu sha baroh ki para nongshong shnong ba hap hapoh ka West Jaintia Hills ban ia pyrkhat ban iatreilang bad ban ym don ka mynsiem jingsngew pher thaiñ ne shnong ban wanrah ia ka khuid ka suba hapoh ki bynta ka Iawmusiang bad Iawthymme.
Ka seng ka la ong ba naduh ki snem ba lah dep ka lah ju ai jingmut sha ka sorkar bad ia ka Jowai Municipal Board ba ka dei ban shimkhia ia ka jaka ba lum bad bret iaki ñiut ha Mynkjai bad ka seng ka lah ong ba kadei na ka jingkheiñ sting ka Municipal Board bad ka sorkar ka sa jia haduh une u pud ba long mynta ba ki paitbah bad ki nongshong iew ki shem jynjar ban ioh jaka pat ban bret iaki ñiut.
U President ka seng u samla Jersom Shylla u la ong ba ka sorkar ka dei ban wad ia ka jaka kaba biang bad paka ban bret iaka ñiut da kaba pyndonkam ia ka rukom jong ka juk stad ba thymmai ne ka Scientific waste management bad u lah ong ba ha shuwa ban leit bret iaki ñiut sha kine ki jaka ka sorkar ka dei ban ioh shuwa ia ka jingpdiang na ki shnong ba marjan bad ki jaka ba lah jied kyrpang ban bret iaki ñiut. U General Secretary ka seng u samla Treibor Suchen u la ong ba ka jingsah ki nuit ha Jowai kadei ba kam don ka jingkit khlieh na ka Jowai Municipal Board bad baka sorkar naduh ki por ba lah leit bad kane ka wanrah ia kane ka jingeh kaba khraw. Na ka liang u ne u samla u la ong ia ka ba lah dep lah dep ym lah shuh ban ia kren hynrei la dei ban pyrkhat thymmai ban ioh ia ka jaka kaba bit ba biang ban wan rah biang ia ka jingkhuid jingsuba ka Iawmusiang sa shisien da ka jingiatreilang ki nongsynshar shnong ki paitbah bad ki nongmih khmat ka ri lum Jaintia.