Ka Khasi Students’ Union (KSU) Narpuh Circle lyngba ka kyrwoh na u Samla Chanmi Syrti Education Secretary, la pyntip sha baroh kito ki samla pule ka thaiñ Narpuh kiba la dep aplai ban iohpdiang ia ka jingpynkup burom da kaba ai khusnam ia kaba la tip kum ka “11th Mait Shaphrang Academic Award 2022”, ki dei ban wan mih ha ka 6 tarik Risaw (Oct) 2022 (Sngi Palei) naduh ka por 10:00am ha Lumshnong Community Hall.
Ha shwa ban sdang ban sam ia ka jingsam khusnam kan don shwa ka Quiz Competition ha kaba yn wan ban iashim bynta da ki khynnah skul jong baroh ki Secondary/Hr. Sec. School ba don hapoh thaiñ Narpuh. Ki nonghikai kin jied tang ar ngut na kawei ka School ban iashim bynta ha katei ka Quiz Competition kumba ka seng ka la dep ban ai jingtip dang shen sha baroh ki school.
Ia kiba ioh 1st, 2nd bad 3rd position ha katei ka Quiz, ka seng kan pynkup burom da kaba ai khusnam. Ha katei ka juh ka sngi ka seng kan pynbna ia ka result jong ka jingiakop thoh essay (Essay Writing Competition) halor ka Sngi Pynneh Mariang (World Environment Day) ia kaba ki 5 tylli ki school hapoh ka thaiñ Narpuh kiba la shim bynta ha katei ka jingiakop thoh essay kaba la dep pynlong naduh ka 5 tarik June 2022.
Ia ki school kiba wan ha ka kyrdan ba nyngkong, ba ar bad ba lai jong katei ka jingiakop thoh essay yn pynkup burom da kaba ai da ki Certificate bad Momento.