Ki dkhot jong Ka Khooid Ya Ka Wah Myntdu (KYM), kawei na ki seng treimon sngewbha ban iada ia ka Wah Myndu, mynta ka sngi 6 tarik Nailar, ki la pynlong ka jingiakren bad ki nongthoh khubor, ha Chilliang Raij Community Hall, na ka bynta ban wad ki lad jingiada ban pynneh pynsah ia ka khuid ka suba jong ka wah Myntdu kaba don sawdong ka nongbah Jowai, kaba dei ruh ka wah kaba bsa um bam um dih ia ki nongshong shnong ka nongbah Jowai bad ki shnong ba marjan.
Mynta ka sngi na ka liang u President ka KYM ma KL Pariat, u la ong ba ka jingthrang jong ka seng halor ka jingkhuid jong ka wah Myntdu mynta la kumba 5 tylli ki snem, ka seng ka la iohi bad ioh sngew ruh ia ka jingud jong ki paidbah ha ka jingiadei bad ki jingshah ktah jong kane ka Wah Myntdu kumba long mynta. Kumta na ka liang ka KYM, u la ong ba ki la ujor sha ka High Court bad kumjuh ruh sha ka National Green Tribunal (NGT) halor kane. U la ong ruh ba na ka liang ka NGT ka la dep ban shong jingialang la kumba saw ne san sien halor ka jingkhuid jong ka wah Myntdu.
Na ka liang u ma Rupaia Lamar uwei na ki dkhot ka KYM, u la pynkynmaw ba shi snem mynshwa la don ka jingshah ktah jong ka wah Myntdu ha kaba ka la kylla jaboh, ha kaba na ka liang ka KYM ka la shim khia ia kane ka kam. Kumba long mynta ka NGT ruh ka la shim khia ia kane kam ha ka jingiadei bad ka jingkhuid jong ka wah Myntdu ha kaba yn don ruh ka Hearing ha ka 22 traik kaba la khot da ka NGT.
U ma JM Pohsngap dkhot ka KYM, u la ong ba ngi don ka jingsngewkhia halor ka wah Myntdu, na ka daw ka jingmih jong ki surok, ki ïing ki sem bad kiwei de ki jingtei na ka por sha ka por sha jan jong ka wah myntdu. Haoid ym lah ban kiar ia kine ki jingtei hynrei dei ban don ki lad ki lynti kumno ban lait pat ia ka jingshah ktah ia ka wah. U la ong ba na ka liang ka KYM, ka la ai jingmut ban thung ia ki dieng ha ki ruh jong ka wah kaba dei kawei na ki lad kaba biang eh ban iada ia ki wah.
Kumta ka KYM ka la ong, ba la dei ka por ban khot sa ia ka jingtrei lang jong ki nongshong shnong ka Jowai bad ki shnong ba para marjan bad ka wah Myntdu, naduh ki Doloi Seiñ Raij Tuber, Seiñ Raij Ïalong, Seiñ Raij Chyrmang, ki nongïalam Balang, President bad General Secretary Synjuk Waheh Chnong Ri Jaiñtia, President, General Secretary ka Synjuk Waheh Chnong Jowai, ki seng Kynthei, Seng bhalang ban wan sha ka jingialang paidbah, ka ban long ha ka 9 August 2025, ha Chilliang Raij Community Hall ha ka por 1 baje nohphai sngi.
