Ka Myntri ba khmih ia ka tnad ka Koit ka Khiah jong ka Jylla, ka Kong Ampareen M. Lyngdoh hynne ka sngi ka 17 tarik Jylliew 2025 ka la ong ba ka Jingpang HIV AIDS bad ka jingkyrni Drok ka kiew bha ha ka jylla bad ia kane ka mat duna bha kiba shimkhia bad iakren watla ka long ka jingpang kaba ma bad kaba ktah ia ka jingsngew jong kito kiba mad ia katei ka jingpang.
Ka Myntri kala ong ka daw ba katei ka khniang jingpang ka kloi bha ban saphriang ka long namar ba ki briew ha kane ka jylla ki duna ka jingtip halor ka jingma jong katei ka jingpang, don katto katne kiba lehraiñ ban iathuh, don ruh ki bym tip ia ki dak ba paw shabar bad don ruh ki bym tip kaei ka daw ba kane ka jingpang ka saphriang. “Ngi tip ba kito kiba pyndonkam lang da u juh u thyrnia ban injek (dih) ia u Drok ki ngat ha katei ka jingpang hynrei ka mat hangne ka long, hato ki imlang sahlang ka kloi mo ban iakren halor kane” ban ka kong Ampareen.
Ka Myntri ka khot ruh ia ki Nongmihkhmat ka Jylla ban mih shakhmat na ka bynta ban iakren bad ki briew kiba ngat ha kane ka jingriam bad ban ai jinghikai ia ki khlem jingpynrem. Ka la ong ruh ba ka Sorkar hapoh ka jingialam jong u Myntri Rangbah u Conrad K. Sangma ka iakhun tyngeh ban pynduh jait ia katei ka jingpang bad ban wad lad kumno ban pynlong ia kiba kyrni drok ban ioh ia ka jingjop.
“Ka Sorkar tang dalade kam lah ban tehlakam ne ai ia kano kano ka program jinghikai khlem ka jingiatrei ryngkat bad ki Dong ki Shnong, ki nongialam niam” ong ka Kong Ampareen.
Katkum ka jingiathuh na ka liang jong ka Myntri ka la ong ba ka jylla kala kynjoh sha ka 9000 tylli ki case HIV ba thymmai man la ka snem, ha kaba kala pynpaw ia ka jingsngewdiaw kaba khraw halor kane ka jingkiew jong ki briew kiba don ia une u jait khniang jingpang. Kum ka jingshimkhia ba kyrkieh na ka liang ka sorkar jylla kala pynbeit ban don ia ka jingai jinghikai sha ki paidbah ban ai jingtip bad jingshemphang halor kumno ban iada bad ban shim ia ki lad jingiada kiba kloi bad ban ruh ban tip kumno ban sumar iala ka koit ka khiah
