Ka Namdong Block and Laskeiñ Block Border Area Peace Committee, kawei na ki Committee kaba dang shu dep ban thaw thymmai, ha kane ka sngi Saitjaiñ 22.07.2023 ka la pynlong ia ka jingialang paidbah ha ka shnong Khanduli, kaba long ruh ka jingialang kaba nyngkong eh jong kane ka Committee, ha kaba ha kane ka jingialang la wan ban ia shim bynta da ki nong shnong bapher bapher, ki sengbhalang, ki shnong ba sah ha ki thaiñ khappud jong ka Assam bad Meghalaya kiba hap hapoh ka Namdong Block bad Laskeiñ Block jong ka West Jaiñtia Hills District.
Ka jingthmu ba hakhmat eh jong kane ka Committee ban pynlong ia kane ka jingialang ka long na ka bynta ban ieng skhem ha kawei ka jingmut ne ka jingiatylli lang baroh ki nongshong shnong jong ka ri Jaiñtia, ki senghhalang, khamtam ki paidbah ba shong ba sah ha ki thaiñ khappud ban pynduh ia ka jingsngew iapher ha ka niam ka rukom, ka kur ka jait, ha ka seng saiñ hima sima ne party kumjuh ban don ka jingmut kaba tang kawei da baroh lang ha ka jingiadei bad ka jingiada ia u pud u sam jong ka jait bynriew Khasi Pnar, kumjuh ban ai ka jingshngaiñ ia ki paradoh para snam kiba shong ba sah ha ki thaiñ khappud kiba na ka por sha ka por ki shah pyndik ha ki briew jong ka jylla Assam khamtam ha ki nong Karbi.
Ia ka jingialang ha katei ka sngi la pyniaid da u Chairman ka Committee u ma Aiborlang Shadap uba long u MDC ka Barato-Mukroh katba ia ki kyntien pdiang burom la ioh na u Waheh Shnong ka Khaduli ma Yooshida Nongspung. Ha kane ka sngi da ki spah spah ngut ki paidbah ki la wan sha ka kane ka jingialang naduh ki shong bapher bapher jong ka ri lum Jaiñtia ki sengbhalang na Khasi Jaiñtia bad ki shnong kiba hap ha ka Block I.
Ki Rangbah kiba la ai jingkren bad ki ba iadon lang ha kane ka jingialang ki kynthup ia u Syiem ka Hima Mylliem bah Lebarious Manik Syiem, ma Erwin Syiem Sutnga (Advocate), MDC Namdong ma Dawan Lyngdoh, bah W. Passah, Chandame Sungoh Chairman HBDRF, ma M.M Thaiang uwei na ki riew rangbah ka thaiñ bad ki waheh shnong na ki shnong bapher bapher ha ki thaiñ khappud kiba la iathuh ia ki jingeh ba ki ia kynduh haduh kine ki sngi wat lada 50 snem tam ba ka Jylla Meghalaya ka la ioh ia ka jylla ba pura.
Na ka liang u Chairman ka Committee u la ong ba kum kane ka jingialang yn sa pynlong shuh shuh sa ha kiwei de ki shnong na ka bynta ban iatai bad wad lad wad lynti ban pynduh ia ki jingeh jong ki paid Khasi Pnar kiba shong haki thaiñ khappud.
