Ka Frontier HQ BSF Meghalaya, Shillong mynta ka sngi kala pynmih ia ka list kyrteng jong ki nongialeh ia ka kam shipai Border Security Force (BSF) kiba la shah jied ha ka thup ba nyngkong ba kin pynbiang noh ia ki kot ki sla ba donkam na ka bynta ka jingjurib ba kynthup ia ki Medical Certificate, kaba dei shi bynta na ka jingpynrung kam ba kyrpang na ka bynta ki Scheduled Tribes jong ka jylla Meghalaya.
Kine ki samla ba la paw kyrteng ki dei ban wan mih na ka bynta ka Documents Verification (DV) bad ka Detailed Medical Examination (DME) ha ka tarik bad ka Centre kaba la buh ha pyrshah ka kyrteng jong ki. Ki dei ruh ban rah lang ia ki kot ki sla da ki Original, kum ka Age proof, ka Educational Qualification, ka Domicile Certificate jong ka Meghalaya, ka Scheduled Tribe Certificate, ka NCC Certificate bad kiwei kiwei ki kot donkam.
Hadien ba ka tnad kala pyndep ia kine ki jingdonkam baroh kan sa pynmih ia ka thup kyrteng ba khadduh (Final merit list) jong ki samla kiba dei hok ban ioh ia kane ka kam.
Kane ka long katkum ka jingpyntip ba la pynmih da ka ophis jong ka Deputy Commissioner, East Khasi Hills District, Shillong mynta ka sngi.
