Ka Deputy Commissioner jong ka East Khasi Hills District ka pyntip ba ka jinglong Dealer jong ki Fair Price Shop ba mynta kan kut noh ha ka 31.12.2022 kumta ka la aplikeshon na ka bynta ban pynthymmai noh ia ka jinglong Dealer hapoh kane ka District na ka bynta u snem 2023 haduh 2027.
Ia ki aplikeshon dei ban mynjur da ki Rangbah Shnong bad na ka bynta ki thaiñ nongkyndong yn mynjur da ki BDO ryngkat ka Court Fee Stamp kaba Rs.25/-. Dei ban suhlang ia ki ST Certificate lane ki Permanent Resident Certificate, ki EPIC, Aadhaar Card, ki Bank Passbook, Mobile Number bad ar tylli ki dur shiteng, ryngkat ka rai jong ka Vigilance Committee jong ki Dorbar Shnong.
Ki nongthep aplikeshon ki dei ban long ki nongshong shnong ba pura jong ka jylla Meghalaya ym duna ia ka 10 snem. U Rangbah Shnong ne u Secretary Shnong bad wat ki dkhot jong ka Committee Shnong ruh kim lah ban aplai ia kane ka kam.
Ia ki kot ba donkam bad jingtip ba bniah lah ban ioh na ka ophis jong i Deputy Commissioner, East Khasi Hills, Shillong hapoh ki por ba long trei bad ka tarik ba khadduh ban pynpoi ia ki aplikeshon kan long ha ka 28/10/2022.