U ma Moonlight Pariat kyrtong ka UDP na 2-Jowai Constituency haba ai jingkren mynta ka sngi ha ka jingialang paidbah kaba la pynlong ha Iawmusiang, Jowai u la kyrpad ia ki paidbah ban jied ia ka Party UDP ha kane ka kynti, khnang ba kan wanrah ia ka jingkylla ha ka rukom synshar khaddar bad ban wanrah biang ia kiei kiba la duh noh na ka sor Jowai bad khamtam eh ban wanrah biang ia ka kamai kajih kumba long ha ki por mynshwa.
Ia kane u ma Moonlight ula kran ha ka jingialang kaba la khong pynlong da ka UDP Jaintia Hills ka la pynlong ia ka jingialang paidbah ha Iawnmusiang Jowai, kane ka jingialang ka long ban pan ka jingkyrshan na ki paidbah kumjuh ruh ban pynsngew ia ka jingmut bad jingthmu jong ka Party UDP hangne ha ri Lum Jaintia bad ha ka jylla hi baroh kawei. Ia ka jingialang la pyniaid da u President Jowai Circle u ma Kitboklang Nongtdu.
U la kren ruh ha ka jingiadei bad ka kam khaii dewiong kaba la shah khang mynta ha ka NGT, hynrei ki dang beit ki trok ba kit dewiong bad la iohi ruh da ki khmat ba ki trok kit dewiong ki juh ur ne hap ha ki rud surok bah, kaba pynpaw shai ba ka don ka jingkhaii dewiong beaiñ bad ka jingioh nong na kane ka jingkhaii dewiong kaba mynta kam leit shu sha ka pla tyngka jong ka sorkar, hynrei ka leit sha ki riew shimet ha ka jaka ba ka jingioh khajna ne ka Royalty kaba dei ban leit sha ka sorkar na ka bynta ban ioh ban siew tulop ia ki nongtrei ka la shu long lehnohei. Ula ai nuksa ki nongtrei ka JHADC haduh mynta da ki bun bun bnai kim ioh ia ka jingsiew ne ka tulop ka jong ki, bad kane ka dei ka jingleh jong kane hi ka sorkar ba bynta khnang ban pynduh bor ia ka District Council.
U la ong ruh ba lada duh ia ka District Council ka mut ki nongshong shnong baroh ki la duh ban kam trai ia ka khyndew ka shyiap la jong, u la ong ruh kumba long mynta dei tang ka jylla Meghalaya ha ki thaiñ shatei lam mihngi kaba ioh ban kam trai ia ki jaka da ki trai jaka hynrei sha kiwei pat ki jylla hapoh ka ri India baroh ki jaka ki dei jong ka sorkar.
Mynta ka sngi la ioh ruh ia ka jingkren na u ma Marki Mulieh Ex-MDC, kong Robila Mylliempdah kaba dei ka Chairperson UDP West Jaintia, ma Baitlang Pohsngap, na Jowai, ma Dawan Lyngdoh MDC u ba long ruh u kyrtong ka UDP na ka 1-Nartiang Constituency, ma J. Treilang Suchiang MDC u kyrtong UDP na 3-Raliang Constituency bad kiwei de.
