Na ka jingioh khur kawei ka takma ksiar ha u 2018, ka Meghalaya ha kane ka kynti ka la lah ban khur haduh lai tylli ki takma ksiar ha ka jingialehkai table tennis jong ka 2nd North East Olympic Games, kaba la poi sha kaba kut hynne ka sngi (14/11/22) ha Indoor Hall jong ka skulbah NEHU.
Kane ka kynhun ialehkai ka Jylla ka la lah ban ialehkai bha na ka bynta ban khur ia ka jingjop ha ka final jong ka mixed doubles pyrshah ia ka Mizoram, kumjuh ha ka women’s doubles pyrshah ia ka Mizoram bad ha ka women’s singles pyrshah ia ka Tripura. Ka Tanushree Dasgupta ka la bat biang ia ka nam lahduh ha ka jingiakhun para marwei jong ki kynthei da kaba bynrap sa kawei pat ka takma ksiar.
Ka Mizoram ka la ioh ban khur ia ka takma ksiar ha ka men’s singles bad kumjuh ha ka men’s doubles.
Ha ka jingiakhun final jong ka women’s bad men’s doubles kaba long hynnin ka miet. Ka Dasgupta bad ka Camelia Diengdoh na Meghalaya ki la lah ban pynliem noh ia ki nongialehkai ka Mizoram kata ka Lalthansangi bad ka Malsawmtluangi da 11-13, 11-6, 11-8, 11-8 ha ka jingiakhun final jong ki kynthei, hashwa ba u Alberto bad u John na Mizoram kin pynliem noh ia ki rangialehkai na Manipur u L. Bikram Singh bad u Y. Boy Singh da 11-9, 11-5, 11-7.
Hynne ka sngi, ka Dasgupta bad u Suranjit Dey ki la lah ban pynliem noh ia u Alberto bad ka Lalthangsangi na Mizoram da 11-5, 12-10, 5-11, 11-7 na ka bynta ban khur ia ka takma ksiar ha ka mixed doubles. Ka Tanushree ka la lah ruh ban pynliem ia ka Sreyashi Chakraborty na Tripura da 11-5, 11-2, 11-7, 11-13, 11-9 ha ka jingiakhun para marwei jong ki kynthei.
Ka Mizoram ka la ioh ban khur ia ka takma ksiar ha ka final jong ka men’s singles, hadien ba u Alberto u la lah ban pynliem noh ia u Lalruatsanga da 9-11, 11-8, 11-1, 11-4, 12-10.
