Ki nongniah cycle ba paw jong ka jylla Manipur kila ioh ban rah ia baroh ar ki nam lah duh ha ka jingiakop niah Cycle jong ka 2nd North East Olympic Games 2022, kata ha ka liang ki shynrang bad ha ka liang ki kynthei kumjuh.
Ia kane ka jingiakhun la pynlong na Shillong shaduh u Lum Mawthadraishan, ha ka jingjngai kaba 80 Km.
Na ka liang jong u Konthoujam Bishan Singh jong ka Manipur ula lah ban bat ia ka kyrdan kaba nyngkong hadien ba ula lah ban pyndep ia kane ka jingjngai hapoh 2 kynta, 28 minit bad 25 second ha ka open men’s category. U ba wan ba-ar u dei u Tajum Dere na ka jylla Arunachal Pradesh u ba la pyndep 2:29:19, katba na ka liang jong ka Meghalaya kala ioh ban ban ia ka kyrdan ba-lai lyngba u bah Kevinjohn Khyllait uba la pyndep ia ka jingniah ha ka por 2:30:45.
Ha ka liang ki kynthei ka Naorem B Devi jong ka Manipur kala wan ba nyngkong hadien ba ka la lah ban pyndep ia ka jingniah hapoh ka por 2:57:18, ka Lindum Kia Kia na Arunachal Pradesh kala wan ba-ar bad pyndep hapoh ka por 3:01:56, katba ka Thokchom Helen Devi na ka jylla Manipur hi ka wan ha ka kyrdan kaba lai kaba la pyndep hapoh ka por 3:04:55.
