Ka Samla Balasiewdor Pathaw kaba dei na ka shnong Nongthliew, Eastern West Khasi Hills District ka la lah ban wanrah burom ia ka Jylla baroh kawei hadien ka jingjop jong ka ia ka takma Ksiar ha ka jingiakop mareh kaba la tip kum ka ‘Vendanta Half Marathon’ ia kaba la pynlong hynne ka step, kata ka 20 Tarik Risaw 2024 ha nongbah Delhi.
Katei ka takma ka la wan hadien ka jinglah jong ka ban mareh tang hapoh 42 minit na ka bynta ka thup (category) 10 KM. Kane ka jingjop ka long ruh ka jingaimynsiem ia kiba bun ki samla ba ieit ia kane ka jait jingialehkai namar na ka bynta ka samla Balasiewdor kane rynsan kadei kaba heh tam bad kaba nyngkong ba kan ïashim bynta shabar jylla. Hooid ha ki jingïakhun kiba la pynlong hapoh ka Jylla ka la mad shibun ki jingjop bad lah ban pynkynmaw hangne ba ha ka Meghalaya Games 2022 ka la ioh ia ka takma Ksiar, ha ka Fit India Freedom Run 3.0 ruh ka la ioh ia ka takma Ksiar bad ha ka District Level Athletic meet, 2023 ruh ka la khur ia ka takma Ksiar.
Ia kane ka jingiakob mareh la ju pynlong man u snem ia kaba la sdang naduh u snem 2005. Ha kane marathon la ju wan ban ïashim bynta da ki snar mareh na kylleng ka pyrthei kynthup ki nongjop takma ha Olympic. U Joshua Kiprui Cheptegei uba dei ruh u nongmareh ba paw ka pyrthei uba la khur ruh ia ka nam lahduh ha ka Olympic kaba la pynlong ha Tokyo (2020) bad ha Paris mynta u snem u la khur ia ka nam lahduh napdeng ki shynrang.
Kum ban shu pynkynmaw ba ka samla Balasiewdor Pathaw ka sah mynta ha Mawlai Nonglum bad ka dang pule ha ka BA 1st Semester hapoh Shillong College.