Ka Manipur bad Mizoram ki la ioh ban khur ia ka takma rnong ha ka phutbol jong ka 2nd North East Olympic Games 2022 kaba long hynne ka snig ha madan MFA Polo ha kane ka sngi Ba-ar.
Ha ka liang ki shynrang, ka Manipur ka la ioh ban khur ia ka takma rnong ha ka jingiakhun kaba itynnad bha pyrshah ia ka Nagaland ha ka thup U-21 ki shynrang bad ioh ia ka jingjop da kaba pynliem ia katei ka kynhun da 4-3 kol.
Ha ka jingiakhun jong ki kynthei hapoh ka thup U-17, ka Mizoram ka la pynliem da 3-1 kol ia ka Sikkim ban ioh khur ia ka takma rnong.
Haba phai sha ka jingiakhun jong ki shynrang, ka Manipur ka la ioh ia ka kol kaba nyngkong lyngba u S Doungel ha ka minit kaba 6 hynrei tang ha ka minit kaba 12 ka Nagaland kala ioh ban pyniakhaid noh lyngba u Vhoto. Ka Manipur kaba la shah rem noh ha ka Meghalaya ha ka semi-final ka la ioh biang ban thep kol ha ka minit kaba 33 lyngba u M Simte bad ioh ban lamkhmat tad haduh ban da kut ka kylla step.
Pynban mar ia sdang ka kylla miet, ka Nagaland kaba la shah rem noh ha ka Mizoram ha ka semi-final ka la ioh ban pynphai biang lyngba u Thulunso ha ka minit kaba 51. Hynrei tang hadien lai minit ei ei ka la shah thep biang lyngba u N Binode Kumar Singh ha ka minit kaba 54 bad na u Doungel ha ka minit kaba 62.
Ka Manipur ka la ioh ban tehlakam ia ka jingiakhun tad haduh shwa ban poi artad ka minit ba khatduh ka Nagaland ka la ioh biang sa shi kol lyngba u Neisede ha ka minit kaba 90+1, kaba kylla long ruh ka kol kaba khatduh ha katei ka jingiakhun kaba itynnad bad mar ia biang bor bha.
Ha ka liang ki kynthei pat, ia ki saw tylli ki kol la ioh ban thep ha ka kylla step ha kaba tang ka Lalrinmawii marwei ka ioh ban thep ar kol kata ha ka minit kaba 10 bad kaba 45+1, katba ka Gladys ka la ioh ban thep lang shi kol na bynta ka Mizoram. Ia ka shi kol na bynta ka Sikkim la ioh ban thep da ka Simran Gurung.