Ha ba phai khyndiat sha ka jingim jong u Bah (L) Latiplang Kharkongor la kha ha ka 6 Risaw 1971. U la pyndep ïa ka kyrdan pule Graduate. B.A. na Shillong College, ha u snem 1998. U la long MDC ka 16- Malki-Nongthymmai la 4 sien kynthih, u la jop MDC nyngkong na ka 16- Malki-Nongthymmai Konstitwensi ha u snem 2004, 2009 bad 2014 na ka party KHNAM. Katba ha u snem 2019 u la jop kum u kyrtong shimet na ka 16-Nongtyhymmai MDC. U bah Latiplang Kharkongor u dei u CEM ba 32 ha KHADC naduh ba la ioh ïa ka District Council kata 1952.
Dei ha ka 22 Naiwieng 2019 u la shimti ïa ka shuki CEM ka KHADC bad u la neh kum u CEM ka KHADC haduh ka 07 Rymphang 2020.
Ha ka jinglong CEM une u rangbah u la thaw ïa ka history ha ka shlem treikam ka KHADC namar ba dei tang ma u, u MDC khlem seng, uba la ioh ban shimti ïa ka shuki CEM, kata ha u snem 2019.
Kum u nongmihkhmat paidbah ula noh synniang shibun ha ka imlang sahlang, ha ka ri bad ka jaitbynriew hi baroh kawei.
Namar ka jingban ka jingshitom la katto katne por, kumta ha ka janmiet jong ka 12 Nailur 2024 u la khlad noh ha Civil Hospitals Shillong.
Ia ka met ba dang sah jong u Bah (L) Latiplang Kharkongor ba la khlad hynnin ka sngi yn sa pyndep khatduh ha ka 15 tarik Nailur 2024 ha u lum jingtep ka Balang Presbyterian Nongthymmai kaba don ha Mawblei.