U Vice President ka Khasi Students Union (KSU) South East Central Circle, u Samla Basuklang N. Khongwar u la ther tyngeh ïa ka sorkar jylla bad ïa u Myntri Rangbah ka jylla,u Conrad K Sangma uba la ong ba ym ju donkam ïa ki briew kiba na bar ban leh ia ka work permit/labour licence ne ki syrnod nongtrei haba ki wan ban trei ha kane jylla bad ong ba kane ka jingkren u Myntri Rangbah ka paw shai kdar ba um tip ïa ka aiñ kaba ka sorkar jong u hi ka shna ban pynmih ïa ka hukum (rule).
Katei ka jingkren ka la mih hadien ba ka KSU South East Central Circle, ka la leit ban khynra work permit ïa ki bar jylla kiba wan ban trei sha ki thaiñ Pynursla bad ha katei ka sngi ka KSU ka la ïoh ban pynher krad ia ki katto katne ngut ki nongtrei bar jylla kiba trei ïa ka ophis jong u Block Development Officer ka Pynursla C&RD Block namar ki wan trei khlem ka work permit kaba donkam ïa kino kino ki bar jylla kiba trei bylla ban ïoh ïa kane ka syrnod pynshisha.
Na ka liang u President ka KSU South East Central Circle, u Samla Wallamjingshngaiñ Suting u la ong ba kane ka sienjam kaba ka seng ka shim ban kynra ïa ki bar jylla kiba wan trei sha ka thaiñ ka long ban pynthikna ba ki dei ban biang ki kot ki sla.
U la ong ruh ba ha kine ki sngi lah ban ïohi ba ka sorkar lyngba ka tnat pulit ka la kem bad shim ejahar hi pyrshah ïa ki dkhot ka seng kiba khynra work permit hynrei u ong ba kum ka seng kim tieng kim smiej ïa kane ka jingpyrshang pyntieng koh tympan ka sorkar hynrei ban iaid shaphrang khlem da pynsngap.