Hadien ka jingphah shithi bunsien sha u Myntri Rangbah ka Jylla ka Joint Action Committee Muster Roll Worker Union ha ka 11 tarik Rymphang 2026 ka la kynthoh ia ka Sorkar hadien ka jingsngap jar jar halor ki mat jingdawa jong ka Joint Action Committee Muster Roll Worker Union. Haba kren sha ki lad pathai khubor na ka liang ka Chairperson jong ka Joint Action Committee Muster Roll Worker Union ka Kong Daiowanphi Iakai ka la pyntip ba ka Joint Action Committee Muster Roll Worker Union ka la phah haduh 5 tylli ki jingthoh sha u Myntri Rangbah ka Jylla u Conrad K Sangma hynrei na ka liang u Myntri Rangbah u la kular ba un sa khot iakren ha u bnai nyngkong u snem thymmai hynrei mynta la poi u bnai ba ar jong u snem thymmai ruh ym pat khot bad u ong iaishah sa katno ngin iaishah la ong ka Kong Daiowanphiiakai.
Nalor kata ka la pynpaw ba naduh u bnai Risaw 2025 ia ka VDA ka Sorkar ka khlem ai shuh da kaba pynpaw ba ki marbam ki la hiar dor hynrei ka kong Daiowanphi iakai ka la pynpaw ba ki marbam ki khlem pat hiar dor la ka dei ha ka mluh ka Umphniang bad kiwei kiwei ki marbam namar kane ka ktah ia ki longïing longsem jong ki nongbylla sngi kiba don ha ki tnad sorkar bapher bapher. Ka la kyrpad ia ka sorkar ba kan shimkhia bad ban khot iakren halor ka jingeh ba ki nongtrei muster Roll ki iakynduh.
Na ka liang u Adviser ka Joint Action Committee Muster Roll Worker Union u Ma Khroo L Pariat u la pynpaw ba ha kiwei ki jylla la pyntreikam ia ka labour Court katba ha jylla Meghalaya kim pat shim la pyntreikam ia kane ka Labour Court bad katkum ka Labour Court ka rta shongthait ka dei 60 snem hynrei ka Sorkar Meghalaya pat ka pynshongthait ia ki nongtrei Muster Roll ha ka rta kaba 58 snem kane ka wanrah jingeh ia ki nongbylla Muster Roll namar ka Sorkar ka pynshongthait ia ki nongtrei muster roll ha ka rta kaba 58 snem.
U la ong ka la don kawei ka order da ka jingmynjur u lat ka jylla ba ym dei ban palat ia ka 65 snem hynrei ia kane ka order ba la long aiñ ka tnad Personnel jong ka Sorkar ka pynduh pyndam noh ia kane ka order u Lat ka jylla ba lah long aiñ bad kumno ka tnad Personnel jong ka Sorkar ka pynduh pyndam noh ia ka aiñ ba la mynjur da u Lat ba ki nongtrei muster roll ki dei ban shongthait 65 snem bad sah ha ka jinglyngoh ba baroh ki muster roll kiba la 58 snem ki shah pynshongthait jubor.
Nalor kata u la ong kaba sngewlyngoh ka long ba baroh 60 ngut ki MLA ym don ba kren halor ka jingkiew dor ki marbam imat ki ia donkti lang bad ka Sorkar. Ka Joint Action Committee ka la kyntu ia baroh ki 60 ngut ki MLA ba ki dei ban kren halor ka jingkiewdor ki marbam bad kumjuh ban pynsngew halor ka jingkynduh jingeh ki nongtrei Muster Roll bad lada ki MLA kim kren eiei hadien ka Assembly ban wan ki nongtrei muster roll kim banse bad ki hap ban mih sha Surok bad hap bud ia ka dustur ha ki por mynshwa katba ym pat mih sha Surok ka Sorkar kam treikam bad ia kane hap ban bud mynta la ong u Adviser ka Joint Action committee Muster Roll Worker Union.
