Ki nongialam jong ka Khasi Student Union (KSU) South Khasi Hills District hynne ka sngi ka 1 tarik Nailur 2025 ki la leit ia kynduh ia u Executive Member ka tnat Trade halor ka jingiohrung laitlaN ki bar jylla ha kane ka jylla lyngba ki slip ha ki rong bapher bapher hadien ha jingkhynra bar jylla jong ka seng.
Haba kren sha ki lad pathai khubor U President ka KSU South Khasi Hills u la ong ka seng ha ki por ba mynshwa lada ki khynra ia ki kot ki sla na ki briew kiba nabar ka seng ka ioh beit ia ka Labour Clearance Certificate jong ka Council bad ka Meghalaya Identification Regulation Safety and Security of Migrant Workers 2020 hynrei mynta u snem pat ki ioh ia ki slip ha ki 3 tylli ki rong bad ha la ka jong ka jong ka jingsoi.
Shuh shuh u la ong na ka liang ka seng kam peit shuh ia kita ki slip ba la dep soi ha la ki jong ki jong rong hynrei kan peit beit ia ka Police Verification bad ia ki NOC na ki dorbar shnong.
Ka seng ka la kyntu ruh ia ki Kontraktor bapher bapher ba kim dei ban pynshitom ban wad ia ki nongtrei kiba dei ki bar jylla hynrei ki dei ban wad bad ialam ia ki nongtrei kiba dei ki trai ri trai muluk.
Nalor kata u la pyntip ba ka seng kan dang iai bteng ban khynra nongbylla bar jylla bad ki bar jylla haba ki wan ban bylla hangne ki dei ban biang ia kot ki sla kum ka Police Verification bad NOC na ki Rangbah Shnong bad lada kim pynbiang ia kita ka seng hi kan shim ia ki sienjam ki ba eh da kaba beh bad pynher krad beit ia ki khlem jingsalia.
