Ha ka jingiadei bad ka jingjia ba ki shipai Border Security Force (BSF) ki la rung jubor bad leh tohmet ia ki dkhot ka longïing jong ka Kong Martina Pohshna bad u Bah Shanroi Lyngdoh Lyngkhoi kiba dei ki nongshong shnong ka Shnong Kuliang Elaka Narpuh, na ka liang ka FKJGP East Jaiñtia Hills ka phah ka khubor pynrem jur ia ki BSF kiba ka kamram jong ki ka long ban peit ia ka shong suk shong saiñ pynban mih ka jinghuri hura na kine man la ka por bad ki nongshong shnong jong kane ka thaiñ.
U President bad General Secretary ka Seng u Bah Deihok Sumer bad u Bah Emlang Sutnga ki la kynnoh ba ka jingshoh jingdat ia u kpa katei ka longïing khamtam ka jingshah ktah kti ka khun khynnah kynthei ba dang 15 snem bad ka kmie jong ka long ka bym lah ban pdiang bad dei ban pynshitom katkum ka aiñ hok longbriew man briew ia kitei ki BSF ba donkti.
Ha kawei pat ka liang ha ka jingiadei bad ka jingshimkhia ki pulit ka Umkiang Patrol Police Out Post ban kem ia ki BSF ba donkti ha katei ka ka kam ka Seng ka ai ka jingiaroh bad shuh shuh ka ban jur ia u Giri Prasad, IPS kum u Superintendent of Police (SP) jong ka District ba un shimkhia ia kane ka jingjia khnang ba katei ka longïing kan ioh ka jingbishar ba hok bad kumjuh ban ai ka jingiada ia katei ka longïing na ka jingshah thombor ha ki BSF ban pynthikna ba ka aiñ ka dei ban leh salonsar la ia kiba don ha ki bor jong ka aiñ khnang ba kum kine ki jingjia kin ym jia shuh nangne sha khmat pynkut ka kyrwoh na ka Seng.