Ha ka jingpynbeit thymmai ia ka hukum kaba la pynmih da u District Magistrate jong ka West Jaintia Hills katkum ka jingkyrpad na ki bor pyniaid jong ka JHADC ba peit ia ka kam jied Dolloi, kumta la pynbeit thymmai ba ym baroh ki dukan die kyiad hapoh ka Elaka Nartiang bad Shangpung kin khang lut, hynrei tang kito kiba don hapoh ka 5 km ka jingjngai na ki jaka thep vote.
Ka jingiathep vote jied Dolloi kan long ha ka 22 bad 23 tarik mynta u bnai na ka bynta ki ar tylli ki Elaka kata ka Nartiang bad ka Shangpung bad ka jingniew vote kan long ha ka 25 tarik.
Kumta ka hukum bala pynmih mynta ka sngi kala btah ia baroh ki dukan die kyiad naduh ki kyiad phareng, ki kyiad pyrsi, ki jaka dih kyiad kiba don hapoh ka jingjngai ba 5 km ki dei ban khang ha kitei ki 3 sngi bala pyntip.