–La sdang ia ka ‘Children Sport Festival’ ha EJH–
Ka jingialehkai sport kaba lai sngi lynter kaba tip kum ka “Children Sports Festival” hapoh ka Azadika Amrit Mahotsav bala pyniaid da ka ophis District Child Protection Unit, East Jaintia Hills District, Khliehriat la wan ban plie pyrda ia ka da u Addl. Deputy Commissioner ka East Jaintia Hills District, Khliehriat, u bah A. Nongbri, MCS, ha madan ialehkai jong ka Dkhiah West.
Haba ai jingkren u bah Nongbri ula ong ba ki kam sport bad ki kam kilan met bad ki kam ialehkai ki long kiba donkam haduh katta katta na ka bynta ka jingkoit jingkhia ha ka met bad ka jingmut jingpyrkhat jong ki khynnah. Kane ka Children Sports Festival ka long ka lad ia ki khynnah ban pyni ia ka sap ka phong kaba ki don, ba kin tip ia ka bor bad ka jingtlot jong ki. Ula ai khublei bad kitbot kitrwiang ruh ia baroh ki khynnah kiba iashim bynta ha kane ka sport bad kyntu ia ki ban pyni ia ka mynsiem ialehkai ha ka por ba ki iashim bynta.
I kong R. Kynjing, iba dei i District Child Protection Officer, East Jaintia Hills haba kren pdiang pdiang sngewbha ia u kongsan bad ia ki khynnah na ki Children’s Home bad kynthup ia ki shynrang bad ki kynthei. Ila iathuh ruh ba ia kane ka “Children Sports Festival” la aibor da ka National Implementation Committee (NIC) bad ka Ministry of Culture bad la pyntreikam ia ka da ka Ministry of Women and Child Development hapoh ka Azadi ka Amrit Mahotsav. I la ong ruh ba kane ka sport kan kut haduh ka 28/04/2023.
Hapoh kine ki 3 sngi ki khynnah kin ioh ban iashim bynta ha ki 100 m race, Relay Race, Kabbaddi, KhoKho, Tug of war, Dodge ball, Cross country race, Basketball, Football, bad ki Indoor games.
