Mynta ka sngi ka ophis treikam jong ka District Social Welfare Officer, West Jaintia Hills kala pynlong ia ka prokram kaba kyrpang ban pynsngewthuh paidbah shaphang ka aiñ kaba ai jingsumar bad ka jingbha jongmiat na ka bynta ki kmie ki kpa ne ki briew kiba la heh la san ka rta. Ia kane ka prokram la pynlong ha District Library Auditorium Jowai.
Ka kong J. Synnah kaba dei ka ophisar jong kane ka tnad kala batai shai bha halor kane ka aiñ bad kala ong ruh ba ki khun ne ki nongsumar ia ki kmie ki kpa ne kiba la san la rangbah ka rta kim dei ban leh beiñ ne ieh beiñ ia ki ha ka jinglong tymmen jong ki, namar ka dor ka aiñ kaba lah ban pynshitom ia kum kine ki khun ne ki nongsuar. Kane ka aiñ ka dei kaba la tip kum ka Maintenance and Welfare of Parents and Senior Citizens Act 2007. Lyngba kane ka aiñ ki khun ne ki nongsumar ki dei ban pynbiang ia ka jingdonkam ki kmie ki kpa ha ka liang ka ioh ka kot bad ha ka liang ka jingkoit jingkhia jong ki.
Ka kong Synnah kala pynkynmaw ruh ba ka sorkar jylla lyngba ka ophis DSWO ka juh pynioh jingiarap Rs.2000/- marwei shi snem, ia ki longkmie kiba la kot sha ka rta kaba 60 snem shaneng bad na ka bynta ki longkpa kiba la kot ia ka rta kaba 65 snem shaneng kiba hap hapoh u line jong ka jingduk.
Kiwei de kiba ai jingkren ha kane ka jingialang ki long ka kong K. Lamar Rtd. Deputy Director Social Welfare, u Dr. K.C. Ajar bad u ma Alan Niangtri President ka Synjuk Waheh Shnong, Jowai.
