Ka Khasi Student Union (KSU) mynta ka sngi ka 1 tarik Nailur 2025 ki la wan iakynduh ia ki nonghikai ka Federation of All School Teacher of Meghalaya (FASTOM) kiba shong iakhih ha madan Malki na ka bynta ban dawa kyntiew kyrdan noh ia ki na ki Adhoc sha ka Deficit bad kumjuh ban pynthymmai noh ia ka jingsiew jong ki.
Haba kren sha ki lad pathai khubor na ka liang u President Rangbah jong ka Seng u Bah Lambokstarwell Marngar u la ong ki nonghikai ki dei ki paia ban saiñdur ia ki khun samla ha ki jingpule bad ka jingmih kumne sha madan ka pyni ia ka jinglehraiñ ia ka jylla.
Kum ka Seng ka ju pynsngew sha ka sorkar ban pynbeit ia ki jingeh khamtam haba iadei bad ki nonghikai, ha kaba ki nonghikai ha jaka ba kin leit sha ki skul ban ai ia ka jingnang jingstad ia ki khun samla sha ki skul ki hap mih madan ban dawa ia ka hok jong ki bad kane ka pyni ia ka jinglehraiñ bad na ka liang ka seng kan iai don ha syndah jong ki bad na ka liang ka Seng KSU lada ki nonghikai ki donkam ha kano kano ka por ka Seng ka long kaba kloi ban iatreilang na ka bynta ka jingbha jong ki nonghikai ban dawa ia la ka jong ka hok jong ki.
