Ki bor pyniaid District jong ka East Jaintia Hills District, Khliehriat mynta ka sngi kila pynlong ia ka Training cum Workshop ba shi sngi halor ka jingsniew u drok na ka bynta ki nonghikai kiba la jied kyrpang na ki skul bapher bapher jong ka East Jaintia Hills District.
Ia kane ka prokram la pynlong ha Conference Hall jong ka ophis u Deputy Commissioner ka East Jaintia, Khliehriat.
U Deputy Commissioner ka District u A. Baranwal, IAS haba ai jingkren ha katei ka prokram ula ong ba ka jingthmu jong kane ka training ka long ban pyndonkam da ki nonghikai ban long ki nongpynsngewthuh shaphang ka jingsniew ba mih na u Drok hapoh ka District hi baroh kawei. U ong ba ki khynnah skul bun sien ki don ka por khambun bad ki nonghikai ha ki skul jong ki, kumta ki nonghikai ki iohlad bha ban khmih thuh ia ka jinglong jingman jong u ne ka khynnah manla ka sngi bad ki iohlad ruh ban ia syllok bad ki khynnah.
U Baranwal ula ong shuh shuh ba ki Nonghikai ki long ka jingkyrmen kaba bha eh ban kyntu ia ki khynnah skul namar ba ki ioh bun ka por bad ki ha ki jaka pule jong ki, ki long ki nongkyrshan kiba dei eh bad ki nonghikai ki bat ia ka kyrdan kaba donburom ha ka imlang ka sahlang.
U DC ula ban jur ruh ia ki nonghikai ban khmih bniah bha ia ka jinglong jingman jong u ne ka khynnah lada ki iohi ia ki dak ki shin ba ka ialam sha ka jingpyndonkam ia u drok ha ka jingim jong ki. Ka bha ia ki nonghikai ban tuklar naduh kaba sdang khnang ba iarap ki khynnah ban lait na ka jingkyrni ha u drok.
Ki phang kiba la ai jinghikai ha kane ka sngi ki kynthup ia ka aiñ NDPS Act, ka Joint Action Plan and Counseling, ki jait drok bapher bapher, ka jingktah jong ka jingpyndonkam ia u drok, ka jingktah u drok ha ki ïing ki sem, ha ka ioh ka kot bad ka imlang ka sahlang bad ka jingktah u drok ia ka met ka phad.
Ha kane ka sngi la wan ban ai jinghikai da u bah B. Jyrwa, MPS, Addl. SP, East Jaintia Hills, u ma T. Kyndiah, District Child Protection Officer, EJH, ka kong R. Patlong Programme Manager MCSWA bad Dr. J. Nongtdu, Medical Officer, In-Charge OST.