U Myntri ba khmih ia ka tnad pule puthi ka Sorkar Jylla, u Rakkam A Sangma u la iathuh ba ki nonghikai SSA kiba kwah ban bteng ia ka kam hikai ha ki skul sorkar kin hap ban pass shwa ia ka eksamin Meghalaya Teacher Eligibility Test (MTET).
Kum ban shu pynkynmaw na ka liang ka Kynhun Myntri Sorkar dang shen kala mynjur ban pynjlan sha ka 45 snem iaki palat 13000 ngut tam ki Nonghikai SSA ban ailad iaki ban iakhun iaki eksamin thepkam Nonghikai haki skul Govt. Lower Primary, Upper Primary, Secondary bad Higher Secondary.
Haba pynbna ïa kane, u Myntri ka tnat Pule Puthi u la pyntip ba ki don haduh 600 tylli ki kam Nonghikai kiba lait hapoh ka Jylla bad shen ka tnat pule puthi kan sa khot thepkam lyngba ka jingpynbna paidbah (Advertisement).
“Ngin sa khot thepkam Nonghikai bad kino kino kiba don ka kyrdan bad kiba la Pass iaka eksamin MTET ki lah ban thepkam Nonghikai khnang baka Sorkar kan ithuh iaki kum ki Nonghikai skul Sorkar” u la ong.
U Rakkam u la bynrap ruh ba ka Sorkar Jylla kan ym lah ban ai jingithuh lut ïa baroh ki 13000 ngut tam ki Nonghikai SSA ha ka Jylla namar ka rukom ai jingithuh iaki Nonghikai hapoh Meghalaya ka iapher bad kiwei ki Jylla hapoh ka Ri India.
U la ong baka jingrai jong ka Kynhun Myntri ban pynjlan iaka rta shaka 45 snem kadei khnang ban ailad iaki Nonghikai SSA kiba dang don haka kam ban ioh ka lad ban iakhun haki eksamin thepkam Nonghikai ba kin ioh ka jingithuh kum ki Nonghikai skul Sorkar.
Shuh shuh u la ong “ki nonghikai SSA ki dei ban Pass iaka eksmin MTET, nangta kin sa shah kynthup kum kiba tbit namar ban ioh jingithuh kum ki Nonghikai skul Sorkar, ki nonghikai ki donkam ban iaid katkum ki kyndon” .