Ka Joint Coordination Committee of Commercial Vehicles of Meghalaya ha ka 13 tarik Kyllalyngkot 2026 kaba la ialam da u Wandonbok Jyrwa, ka la pynpaw ia ka jingsngewkhia kaba jur halor ka jingthmu ka Sorkar ban buh bad pyndonkam ia ki tiar Global Positioning System (GPS) ha ki taksi, ki bos bad kiwei kiwei ki kali kamai ha kylleng ka jylla.
U la ong ka kynhun nongniah kali kamai hapoh ka shatri JCCOCV ka la pan jingshai na ka tnad Transport, da kaba pynpaw ba katei ka jingbthah kam long kaba lah ban pyntreikam hapoh ka jinglong jingman ha jylla.
Ka Komiti ka la kdew ba bun ki nongñiah kali bad ki trai kali ki duna ka jingnang jingstad kaba biang ban pyntreikam bad maramot ïa ki GPS, katba ka jingpynthut ïa ka network man ka por ha ki jaka lum bad ki jaka ba shapoh kan pynlong ïa kum kine ki tiar ban ym lah ban treikam. Ki la pynpaw ruh ïa ki mat kiba ïadei bad ka jingkit kaba khia, ha ka liang ka pisa tyngka kaba don khamtam eh na ka bynta ki nongpynïaid kiba rit kiba shaniah tang ha ka kamai kaba man ka sngi na ka bynta ka jingim jong ki.
Ha kane ka jingiakynduh, ka Committee ka la pyntip sha u Transport Commissioner ba ka jingpynjari ia ka jingbthah jong ka GPS khlem da pynbeit shwa ia kine ki jingeh kan buh jingeh khlem da donkam ia ki nongpyniaid kali kamai.
Shuh shuh ka Joint Coordination Committee ka la pynpaw ba ki bor ba dei peit ki kubur ïa ki jingeh ba la pynpaw bad pynthikna ruh ba ïa kane ka kam yn sa bishar bniah bha. Ka Committee ka la pynpaw ka jingkyrmen ba ka tnad Transport kan shim ia ka rukom kaba shisha bad kaba iamir jingmut shwa ban pyntreikam ia kum kine ki lad ki lynti.
Ka Committee ka la ai jingmut ruh ba ka sorkar ka dei ban pyntreikam shwa ia ka GPS ha ki kali jong ka sorkar ban bishar bniah ia ka jingtreikam, bad ki jingeh jong ki halor ka jingbuh ia ki GPS.
Na ka liang u Commissioner ka tnad transport u la pyntip ba un sa thoh sa ka Sorkar da kaba khmih lynti ba ia kane ka mat yn sa iakren shuh shuh bad ka Sorkar ban bishar bniah ban pyntreikam Ia ki GPS.
Na ka liang ka Joint Coordination Committee Of Commercial Vehicle kan pyrshah beit Ia kane ka jingthmu ban buh bad pyndait ia ki GPS tracking Device ha ki kali kamai ha ka jylla.
