Ka University jong ka Science and Technology
Ka Meghalaya (USTM), ka skul bah kaba la pynskhem da ka NAAC, ka pynbna ba ka sorkar India bad ka National Medical Commission (NMC) kaba mynjur ïa ka jingdawa ïa u PA Sangma International Medical College and Hospital (PIMC), ka jingtreilang jong ka USTM bad ka Sorkar Meghalaya.
Kane ka jingailad ia kane ka Medical College ba kan shim ia ki 150 ngut ki samla pule na ka bynta ban plie paidbah ia ka MBBS Program, kaba pyni ia ka sienjam kaba thymmai ha ka jingkular jong ka USTM ban ai ia ka jinghikai kaba ha khlieh duh ha ka lyngkha jong ka dawai.
Ka PIMC ka la buh ia ki mawjam ha ki lai tylli ki bynta: kata, ka jinghikai ba bha ha ka liang ka koit ka khiah, ka jaka sumar pang kaba pawnam, bad ka jaka wad bniah kaba thymmai.
Ka Session Academic kan sdang naduh ka taiew ba khatduh jong u bnai Risaw 2024 da kaba khot ia ki aplikeshon na ki samla kiba kwah ban long doktor na ka Jylla Meghalaya bad kylleng ka ri.
Haba ai jingkren, u M Hoque, Founder Chancellor ka USTIM, u la ai khublei ia ka Sorkar Meghalaya na ka bynta ban tyrwa ïa ki jingkyrshan baroh ban bud ryntih ïa ki kyndon jong ka NMC ha ka por ba la buh thong.
U la ong, “Kane ka dei ka sienjam kaba kongsan na ka bynta ka USTM ba kan lah ban noh synniang kaba don jingmut sha ka tnad ka koit ka khiah jong ka thaiñ bad ka
ka jaitbynriew”.
U la bynrap ba “Nangne shakhmat ki nongpang bad ki samla pule kim donkam ban leit shabar ka Jylla na ka bynta ban ioh ia ka jingshakri ha ka koit ka khiah.” “Ka hospital ka ban lah ban sumar halor ka Organ Transplants kan don ha kane ka jaka sumar da ka jingwan pyniasoh ki doktor kiba tbit bha na kiwei pat ki bynta jong ka ri bad ka PIMC .
Ka PIMC ka don ka jingthmu ban long ka jaka pule kaba pawnam na ka bynta ka jinghikai ha ka liang ka koit ka khiah ha ka thaiñ shatei lammihngi ka Ri India. Ka kolej kan ai ia ka jinghikai kaba bniah kaba la shna khnang ban pynroi ia ka jingpynroi ia ki nongtrei ka koit ka khiah kiba la pynkhreh ban pynbiang ia ki jingdonkam ha ka koit ka khiah jong ka jaitbynriew.
U la iathuh ba la mang 40 tylli kum ki seat sorkar Jylla, bad na kine 25 tylli kin long kat kum ka Government Fees Structure bad 15 tylli ki seat kin long ha shiteng na ka rukom siew ka University, katba ia ki jingpule ha kiwei ki course ha kaba iadei bad ka koit ka khia kan ia syriem kumjuh ia ka jingai Admission ia samla jong ka Jylla Meghalaya.
Kane ka Medical College kaba thymmai tam, kaba la pyndap da ki lad jinghikai-pule kiba kham tbit bad ka jingthmu halor ka jingwad bniah bad ka thmu ka long ban khring ia ki samla pule kiba don sap na kylleng ka ri bad shabar.
ka kynhun ba nyngkong eh kaba don 150 ngut ki samla pule, ka PIMC ka la pynkhreh ban buh ïa ki kyndon kiba thymmai ha ka jingpule doktor bad ki jingshakri ha ka koit ka khiah.
Ha kaba iadei bad ki jaka sumar, yn ai 50% ki jaka sumar na ka bynta ki Super-Specialty sha ki nongpang na ka Jylla Meghalaya kiba don ki jaka sumar khlem jingsiew. Kawei na ki mat ba kongsan jingthmu ka long ban khring ia ki Ri ASEAN ban ioh ia ki lad jingsumar jong ka PIMC ha ka por ban wan.
Da kaba ithuh ïa ka jingnoh synñiang jong u Late Dr. Donkupar Roy, u Myntri Rangbah ba rim ka Jylla Meghalaya, ki bor pynïaid ki la rai ban pynkyntang ïa kane ka Dental college kaban sa wan kum ka jingburom ïa u Dr. Donkupar Roy.