Mynta ka sngi ka ophis jong ka District Horticulture Officer, West Jaintia Hills District, kala pynlong ia ka iew pyni-nam ia ki mar-rep mar-riang kaba la tip kum ka Horticulture Exhibition Under MIDH Scheme 2023-24. Ia kane ka iew pyni-nam la pynlong ha madan Marian Hill Higher Secondary School, Jowai, ha kaba u MLA ka Jowai u ma Wailadmiki Shylla u la long u kongsan ryngkat ka jingiadonlang ka kong D.C. Sohtun, MAS Director of Horticulture Meghalaya Shillong bad kiwei. Ha kane ka iew pyni-nam ia ki mar-rep mar-riang la wan ban iashim bynta da ki shnong bapher bapher jong ki lai tylli ki Block kiba don West Jaintia kiba kynthup ia ka Laskein, Thadlaskein bad Amlarem Block.
Ha kane ka iew iakop pyni nam mynta ka sngi la wanrah ia ki jait jhur, jait syntiew, ki symbai jhur, ki jait syiar bapher bapher na ki shnong bapher bapher na kitei ki lai tylli ki Block, ha kane ka sngi la sam ruh ia ki khusnam sha ki nongjop ha kane ka jingpyninam ia ki mar rep jong ki.
U Kongsan u ma Wailad haba kren u la ai ka jingiaroh ia kane ka tnat kaba la lah ban pynlong ia kane ka iew pyni nam kaba long kaba donkam ia ki nongrep ym tang ba kin pyni ia ka jingbha jong ki mar jong ki hynrei kin ioh ka lad ban ia phylliew jingmut bad ki nongtrei kane ka tnat kaba ia dei bad ka rep ka riang.
U ma Wailad haba kren u la ong ba "Ngi dang don shibun eh ki jingdon kam ha ka jingiadei bad ki mar rep mar riang bad kane ka pynioh ia ngi ka lad ba lah ban pynheh pyniar shuh shuh ia ka kam rep kum ka lad kamai ka jong ngi, hynrei kaba sngewsih ban peit ba don ki nongrep kiba hapoh ka ri jong kiba shu rep tang ban ioh skim sorkar, hynrei ki khlem wad ki lad kumno ban pynheh pyniar ia ka kam rep jong ki khnang ba kin ioh nong shibun kumjuh ruh ban pyndap ia ka jingdonkam hapoh ka jylla".
U ma Wailad u la kyntu ia ki nongrep ba kiba don ki khun kiba la nang la stad ruh ki dei ban ai lad ne hikai ia ki ban nang ia ka kam rep kam riang ne phah leit pule haka laiñ jong ka kam rep kum ba long sha kiwei pat ki jylla. Namar kumba long mynta ym tang hangne hapoh ka jylla jong ngi hynrei ha baroh hi ym lah shuh ban ai kam sorkar ia uwei pa uwei u ne ka briew, kumta u la kyntu ia ki kmie ki kpa ban ki dei ban pynshlur ia ki khun jong ki ha ka kam rep ban ioh pynteikam kat kum ka kjuk mynta.
Ka kong Sohtun haba kren ha kane ka jingiakop pyninam ia ki jingthung jingtep ka la ong ba don shibun ki skim bapher bapher ne ki lad jingiarap lyngba kane ka tnat treikam jong ka sorkar kaba ia dei bad ki nongrep, kumta ka kyntu ia ki nongrep ba ki dei ban wan mih sha ka ophis jong kane ka tnat kaba don ha ki District ne hapoh ki Block jong ki, ha kaba ki lah ban ia kynduh ia ki sahep bad ki nongtrei kane ka tant na ka bynta ki jingiarap bapher bapher.
Mynta ka sngi la ioh ruh ia ki jingkren na u bah S. Rani Director Horticulture Officer WJHD, bah Mutshwa Thabah Vice Chairman EARMACS, ma R. Lamare Assistant Director Officer West Jaintia Hills District ryngkat ka jingiadonlang kiwei de ki officer bad nongtrei kane ka tnat.
