U Myntri Rangbah ka jylla u Conrad K. Sangma u la ai ksai ba ka jingiakhih jong ki Nonghikai ADHOC kiba la ïakhih hapoh ka shatri jong ka Federation of All School Teachers of Meghalaya (FASTOM) kan ym lah ban urlong namar ym dei tang ki Nonghikai ADHOC kiba mad jingeh hynrei don bun ha kaba u la kdew ba ki Nongtrei ka Garo Hills Autonomous District Council (GHADC) lei ki mad kaba kham eh shuh shuh ia kaba ki Nonghikai ki mad.
U Sangma u la pynkynmaw ba ki nongtrei GHADC ki la ïakhih ba khlem pat ioh tulop da ki phew bnai namar ka jingbym don tyllong ka Council katba ka jingiakhih jong ki Nonghikai ka pher shibun namar ym dei ba ki shah set tulop hynrei ki ioh man u bnai pynban ki dawa sa kawei pat, ong u Myntri Rangbah.
“Ka ishu jong ki ka long ba ki kwah ia ka jingkyntiew Kyrdan (Adhoc sha Deficit) bad ym dei namar bym ioh tulop ha ka por ba biang. Ka Sorkar ka la eksamin ha kaba iadei bad kane ka bynta namar kane ka mat ka long kaba kham jyrwit jyrwat bad kaba ktah lang ia kiwei lada ngim pyrkhat bha”.
Ha kaba iadei bad ka jingdawa jong ki Nonghikai ADHOC u Myntri Rangbah u khlem ai ia ka jubab kaba shai hynrei la shu ban bunsien ba ka Sorkar ka dang peit bniah na ka bynta ka jingmyntoi lang jong baroh.
Ka jingiakhih jong ki Nonghikai ka la poi sha ka sngi ba 9 bad yn dang bteng ruh mynta ka sngi ha Madan Malki Shillong tad haduh ba ka Sorkar kan ai ia ka jubab katkum ka jingdawa jong ki.
