U Lat ka Jylla U CH Vijayashankar mynta ka sngi ka 2 tarik Nailur 2024 u la pynkup burom ia ki khynnah ialehkai phutbol ka Nongjri Presbyterian Secondary School kiba la wanrah jingjop ia ka Jylla da kaba rah nam lahduh ha ka jingialehkai Inter School Subroto Cup 2024 ha Bangalore.
Ha kane ka sngi pynkup burom la iadon ryngkat lang da u Chief Minister ka jylla U Conrad Sangma, U myntri ka tnat ialehkai u Bah Shakliar Warjri, U MLA ka Mawhati U Bah Charles Marngar bad kiwei kiwei ki nongshah khot sngwbha.
Haba ai jingkren ha kane ka sngi pynkup burom u Lat ka Jylla u la ai jingiaroh ia kine ki khynnah ialehkai kiba la trei shitom ban wanrah nam ia ka Jylla ha kane ka lympung ialehkai ba heh hapoh ka ri India. U la ong ruh kam long kaba suk ban jop kum kine ki tournament khlem da trei minot bad pynshitom ialde. U Lat u la ong ruh kum uwei na ki khynnah ialehkai ha ki por mynshwa ka ba biang tam eh ban ialehkai ka dei naduh ka rta 6 haduh 16 snem bad ha kine ki por ki khynnah ki khlaiñ ka bor met bad ka bor jabieng bad ki lah ban pyni iala ki sap ki phong ba ki don kum ki nongialehkai.
U Lat u la ai jingiaroh ruh ia ka sorkar Jylla kaba la kyrshan bad bei tyngka ia ka sport hapoh ka Jylla bad u kyntu ia ka Sorkar ba kan bteng ban bei tyngka shuh shuh khnang ba ki nongialehkai kin ioh ban wanrah burom shuh shuh ia ka Jylla baroh kawei namar ki samla ki dei ka lawei ba baphyrnai na ka bynta ka Jylla.
Ha ba ai jingkren na ka liang jong u Myntri Rangbah u Conrad Sangma u la ai jingiaroh bad ai khublei ia u Lat ka jylla u CH Vijayashankar bad u la ong ruh ym pat ju don kum une u Lat uba sngwrit bad sbun mynsiem ban pynkup burom ia kum kine ki jait programme ha ka jingialehkai sport.
Shuh shuh u Myntri Rangbah u la ai jingiaroh ia kine ki khynnah ialehkai kiba la wanrah burom ia ka jylla khlem pynlehnohei bad u la ong ruh ba ka sorkar na ka por sha ka por ka bei tyngka ia ki jait jingialehkai bapher bapher, bad ban pynbha ha ka sport khnang ban wanrah ia ki player ba kynsai ha ka Jylla.