Ka proseshon Iukharist kaba shisien shisnem jong ka Mooksiang Parish kaba dei ban long ha Parish la pynlong ia ka ha Thadmuthlong A hynne ka sngi 8 tarik hapdeng ka jingiphuh iphieng da ka jingiadonlang ki Rangbah na ka Balang Presbyterian, ki Rangbah Nongkitkam ka Sein Raij (Niam Tre) Muthlong bad kiwei de ki riewkhmat na kiwei kiwei ki kynhun Balang bad da ki hajar ngut ki paidriewngeit kiba la iawan shimbynta ha kane ka Proseshon Iukharist kaba shisien shisnem jong ka Parish Mooksiang-Phramer, West Jaintia Hills District.
Ha ka por 10 baje mynstep la pynlong ia ka jingknia Mass Iukharist bakhuid ha kaba u Phadar (Sohblei) Martin Shylla, Vicar General jong ka Jowai Diocese uba long ruh u Parish Priest jong ka Sutnga Parish, East Jaintia Hills ha ryngkat ka jingsynran lang ki Lyngdohsohblei (Phadar) kiba wan na kiwei kiwei ki Parish jong ka Diocese bad nabar.
U Phadar Martin Shylla haba kren ha kane ka sngi u pynpaw ia ka jingkmen kaba khraw ia ka jingiadonlang ki riewkhmat na ka Kynhun Balang Presbyterian, ki ‘riewkhmat na ka Sein Raij Muthlong bad kiwei de ki kynhun Balang bad u ong kane ka dei ka Mynsiem ka jingiatreilang kum ka jaitbynriew Khasi- Jaintia kiba don ha kine ki Lum bad ki Them kiba itynnat jong ka jaitbynriew. Haba phai sha ki paidriewngeit pat u ong ba ka snem 2026 ka dei ka snem jong ki ‘riewngeit, ki Synran jong U Khrist bad ban long ki Synran ba shisha jong U Khrist, ka paw ha ka jingim jinglong jong ngi ki khristan kaba man la ka sngi.
Haba pharia bad iasam ia ka ktien ka jong U Blei kaba la shim na u Phrophet Isaiah 58 : 7-10, na ka shithi 1 u Paul Apostol sha ki Kor. 2:1-5 bad na ka Gospel Mt.5:13-16, u Phadar Martin Shylla u ong ban long ki Nongbud bad ki Synran bashishja jong U Khrist, ki khristan ki dei ban don lai tylli kiei kiei. (1) ban long kiba sbun bad leh isynei ia kiwei (2) ban pynshong nongrim ia ka jingngeit ha U Blei ym ha ka bor jingstad briew bad kaba (3) ban long ka Mluh bad ka jingshai jong ka pyrthei. Nangta u batai shuh shuh ban long ka Mluh kamut ba ki ktien bad ki kam jong ngi ki dei ban long kiba thiang kiba bang ym ka ban pynsngewsih bad pynmong ia U Blei bad iala ki para briew bad ka jingshai ka long ba ngin long ka jingshai kaba pynshai ia kiwei kiba don hapdeng ka jingdum bad lada ngi iaid ha ka jingshai ngin ym ur ym hap shaduid shakharai bad u pynkut ia ka jingkren da kaba kyntu ia ki paidriewngeit ba une u snem 2026 u dei u snem jong ki riewngeit bad u kyrmen skhem ba ki paidriewngeit kin imbha im miat, im sngi ban pynbna ia ka Khubor babha bad da ka jingim jinglong khristan kaba man la ka sngi, hala ïing halasem, ha shong ha thaw, ha ka imlang sahlang, ha ka Balang, ha ka Akor, ka burom ha ka ktien ka thylliej bad da kaba pynshong nogrim ia ka jingngeit ha U Blei ym ha ka jingstad briew.
Ha ka nohphai sngi la pynlong ia ka jingiaid proseshon Iukharist hapoh ka shnong Thadmuthlong A ha kaba da ki hajar ngut ki paidriewngeit ki la iashim bynta da ka jingshongshit da ki jingruwai, ki jingduwai riewblei ha ryngkat ka tem ka put ha shilynter lynti ka proseshon bad la pynkut ia kane ka sngi da ka jingkyrkhu ba kyrpang na kti u Phadar Martin Shylla da ka Sakramen bakhuid tam ka duwan, ka Sakramen ha kaba u Trai Jisu U shongrieh ha ka dur jong u Kpu uba la pynkyntang.
Ha kane ka sngi ia ki sur jingrwai kiba sngewtynnat ha ka por Mass bakhuid la lamkhmat da ki Nongrwai ka Xerian’s choir, Mawsynram Parish, Archdiocese Shillong.
