Ka Greentech Foundation Meghalaya, India kaba dei ka kynhun kaba trei mon sngewbha na ka bynta ka jingkhuid jingsuba ki lum ki wah ha kane ka jylla hadien ba ka la pynlong ïa ka programme pynkhuid ia ka Wah Umiam ha kane ka taiew, ka la lap shibun ki thyrnia injek bad kane ka la pynlong ia ki ban buh jingkylli hato kine ki tiar injek kiba wan tuid sha kane ka wah ki dei ki injek jong ki briew kiba bret hadien ba la pyndonkam injek drok ne ka jingbret pathar ki jaka sumar/hospital.
Kane ka kynhun hapoh ka jingialam jong u Bah H. Nonglang, kadei ka kynhun kaba la pyniaid ia kane ka kam khlem kano kano ka jingiarap na ki bor sorkar ne kino kino ki kynhun hynrei la ju kyrshan bad snohkti lang da ki Dorbar shnong na ka jingleit jong ki ban pynkhuid ha ki shnong bad ki dong jong ki.
U Bah Nonglang u la ong ba kane ka jingbret klumar ia kine ki thyrnia kan wanrah jingma ia ki briew kiba tong dohkha bad ha kajuh ka por ka long ruh ka jingijli ban iohi kum kine ki jait kam.
Kum ban shu kdew khyndiat, kane ka kynhun kam dei kaba peit ia ka jingkhuid tang ha ki jaka sor, hynrei ka peit bad sumar ruh ia ka jingkhuid ha ki jaka kyndong bad shajngai bad dang ha kane ka taiew ba lah dep, kane ka kynhun ka la leit ban pynkhuid ia ka wah Ranikor kaba don ha South West Khasi Hills District.
