“Ka aiñ ka don”
Ha ka jingmih khubor hynnin ka sngi ka 15 tarik Ïaiong 2025, ha kaba iadei bad ka jingmih ki ‘riew shim kabu da kaba pyndonkam da ki risit ha ka kyrteng jong ki Seng Bhalang bapher bapher ban lum pisa na ki nongshong dukan kiba don ha Khyndai-Lad bad ha Ïewduh, u Symbud Myntri Rangbah ka jylla, Bah Prestone Tynsong u la pyntip sha baroh ki trai dukan bad ki nongshong madan ba kin pyntip mar mar sha ki bor pulit lada ngat biang kum kine jingleh shukor kaba ktah ia ki trai dukan bad ka jinglehraiñ ia ka kyrteng jong ka Jylla.
Haba iakren shaphang kane ka mat, u Bah Prestone u la ong ba hadien ba u la ïakynduh bad ki bor pulit, ki Nongïalam hapoh ka Distrik, u la bthah ia ki ba dei ban iakren bad kito ki trai dukan khamtam kito kiba la ngat ha kane ka apot bad u la bthah ruh ba dei ban shimkhia ia kane ym tang ha Ïewduh hynrei ha ka jylla hi baroh kawei.
Shuh shuh u Bah Tynsong u la pynskhem ba ka aiñ ka don bad ki briew kim dei ban sheptieng ban pyntip sha ki bor Pulit. “Lada ngat biang ha kum kine ki khep, ki nongshong dukan ne ki riew shimet kim dei ban pynslem ban pyntip sha ki bor Pulit ba kin leh ia kaba donkam. Phi lah ruh ban shu pyntip sha ki bor ka aiñ lyngba ka mobile phone ruh bad ia ki nombor (emergency number) la pynbiang ha kaba phi lah ban phone ha kano kano ka por bad ngin leh ia kaba donkam” ong u Symbud Myntri Rangbah.
U Bah Tynsong u la maham jur ba lada lap ia kino kino ki ‘riew shim kabu kiba pyrshang ban pynthohbria ha ka kyrteng jongno jongno, yn pynshitom katkum ka aiñ.