Ka Demthring Sports Club ka kitbok kitrwiang ia u Givenson Suting uba la mih noh na ka ïing ka sem bad ka Shnong ka thaw mynta ka step (15.06.2023) ban leit pyniasoh noh bad ka Bengaluru FC ba un shah hikai hapoh ka Academy jong ka.
U Givenson Suting u dei u khun jong u ma Iengskhem Ryngkhlem bad ka kong Banlam Suting kiba shong ba sah ha ka shnong Demthring, West Jaiñtia Hills District. U long u khynnah skul uba ju pule ha North Liberty Higher Secondary School, Jowai naduh Class- III haduh Class- VII. Kane ka skul ka la ioh bha ban saiñdur ia u naduh ka pule puthi haduh ka jingialehkai Football. Kumjuh ruh u long u khynnah uba ju ioh jinghikai na kiwei ki coach kiba don ha ri lum Jaiñtia.
“U Givenson u la ju mihkhmat ia ka Demthring Sports Club ha ka Under- 12 bad Under- 13. Ka jingleit pyniasoh jong u bad kane ka club (Bengaluru FC) kaba paw hapoh ka ri India jong ngi ka long ka jingkyrkhu ia u ha kaba un nang ioh shuh shuh ia ka jinghikai kaba kham biang. Na ka liang ka club ka kitbok kitrwiang ia u ba un ioh ka met kaba koit ba khiah khamtam ba un nang lah ban pyndonkam hok ia ka sap ba u la don” pynpaw ka kyrwoh na ka Demthring Sports Club.