Ka tnad Directorate of Sports & Youth Affairs, jong ka sorkar Meghalaya kala phah ia ka jingkitbok kitrwiang sha ka kynhun jong ki samla kaba la mihkhmat ia ka jylla sha ka lympung jong ka 67th National School Games 2024, under- 17 Boys Championship ha ka jingialehkai Basketball ka ba sdang naduh ka 25 tarik haduh ka 30 tarik mynta u bnai ha nongbah Gurugram jong ka jylla Haryana.
Ia kane ka lympung la pyniaid da ka School Games Federation of India. Ka thong jong kane ka lympung ka long ban pynioh ha ki smala ia ka lad ban pyni ia ka sap ka phong ba ki don, kumjuh ruh ban pynioh ha ki ia ka jingmut jingpyrkhat kaba khuid, ka met ka phad kaba biang pura bad ka jingnang ba pyniadei na ka bynta ki khynnah skul.
Ha kane ka kynti kila don 12 ngut ki rang ialehkai ha kaba la synran lang ia ki da ki 2 ngut ki nongpeit (officials) kiba kynthup ia i Yolinda Hynniewta, Coach bad u Renaldy Jyrwa Manager.
Ka jingjied ia ki nongialehkai la leh da ka tnad Directorate of Sports & Youth Affairs ha kaba la pynmih ruh ia ka jingpyntip paidbah ban wan sha ka jingjied kaba la pynlong ha ka NEIGRIHMS ha ka 10 tarik u April 2024.
Baroh ki nongialehkai ki dei ki nongshong shnong jong ka Meghalaya bad kiba pule ha ki skul kiba pher ba pher. Na kine ki 12 ngut baroh, 7 ngut ki dei na ka East Khasi Hills, 1 na North Garo Hills, 1 na Eastern West Khasi Hills, 1 na East Jaiñtia Hills, 1 na East Garo Hills bad 1 na Ri Bhoi District.