Mynta ka sngi na ka liang jong u Dr. Heipor Uni Bang u la pynpaw “Nga sngewkmen bad ïoh mynsiem shi kat dei eh ïa kane ka sienjam ka Dorbar Shnong ha shuwa ba ngan leit shimti ïa ka Khusnam na ka President ka Ri ka Droupadi Murmu ka ban long ha ka 5 tarik u bnai September, 2025 ha Nongbah New Delhi, ngam don kyntien shuh ban pynpaw ïa ka jingkmen jong nga namar ka Shnong ka dei ka mynsiem ka jong nga bad ngam sngew khun swet shuh ynda nga leit Delhi ruh namar ha shuwa ban ngan leit ka Shnong ka la don ryngkat bad nga”.
U Secretary Shnong Wapungskur u Ma Aristotle C. Rymbai u la pynpaw ka jingkmen bakhraw bad ïaroh shi katdei ïa u Dr. Heipor Uni Bang ba u wanrah burom bad nam ïa ka Shnong, lyngba jong u ka Shnong Wapungskur kan paw ha baroh kawei ka Ri India ba ka Shnong Wapungskur ka sei ïa ki Nonghikai ba stad bad ym dei ruh tang ïa ka Shnong Wapungskur hynrei ïa ka District East Jaiñtia Hills bad ïa ka Jylla hi baroh kawei.
Na ka liang u Waheh Shnong ka shnong Wapungskur u Ma Posling Dkhar ha ba ai jingkren u la pynpaw ka jingkmen ba Khraw bad ïaroh ïa u Dr. Heipor Uni Bang ba don kum u ne u Rangbah ha ka Shnong jong ngi u la lah shi katdei ban noh synniang sha ka imlang ka sahlang hapoh ka Shnong khamtam ha kaba ïadei bad ka jingai ïa ka jingnang jingstad ïa ki khun jong ka Shnong bad ki para Shnong ba marjan namar lyngba une u Rangbah ki khun ka Shnong kiba duna dkhot met ki la ïoh lad ban pyndep ïa ka jingpule jong ki ha K.B Memorial Secondary School Wapungskur kaba dei ka skul ba la seng da une u Rangbah.
Kane ka skul ka wanrah nam ruh man la u snem ïa ka Shnong jong ngi da ka jing pass bha ki khynnah ha ka SSLC Examination, u Ma Postling Dkhar u ai ruh ka jingkitbok kitrwiang ïa u Dr. Heipor Uni Bang ba un dang lah shuh shuh ban ai ïa ka jingshakri kaba bha tam ha ka imlang ka sahlang bad khamtam ha ka pule dangle.
