“Ngim donkam shuh ïa u Shukla” : NEHUTA
Hynne ka sngi ka 11 tarik Ïaiong kaba dei ruh ka sngi ba wan shimti ka Kong Sharwin M. Sungoh kum ka Acting Vice Chancellor ka skulbah North Eastern, ka NEHUTA bad NEHUSA ki la pynlong ia ka jingialang ha khmat ka phyllaw jong ka VC ban pdiang sngewbha bad ruh ban iai pynpaw ia ka jingpyrshah na ka bynta ka jingthmu jong u Professor P. Shukla ban bteng biang ia kane ka shuki.
Hadien bun tylli ki bnai ba u Prof. Shukla u la phetrieh na ka jingiakhih jong ki samla pule bad ki dkhot ka NEHUSA ban weng noh ia u na ka kam na ka daw ba u leh ia ki kam buhrieh, kata da kaba thep kam sop sop ia ki briew lajong ha katei ka skulbah.
Ha ka jingioh iakren bad u Bah Lakhon Kma President NEHUTA, u la ong ba ka skulbah NEHU da ka jingkmen ka pdiang ia ka Kong Sharwin ban shimti ia ka kam VC jong kane ka skulbah. Ki la pynpaw ruh ia ka jinghun bad ka jingshaniah ba ka Kong Sungoh ka lah beit ban trei ia kane ka kam namar ka dei kaba don bha ia ka jingtip bad namar ba ka la slem ban don ha NEHU.
Ka NEHUTA ka la pynpaw ruh ia ka jingioh mynsiem ba ka Kong Sharwin ka la kyntaid ban shimti ia ka kyrdan PVC bad pdiang ban shimti kum ka VC ba shipor kane ka skulbah.
U Bah Lakhon u la ong ba lada i Kong Sharwin in don sah ha ka kyrdan PVC im lah ban treikam pura namar ia ki kam ba khia hap ban pan jingbit na u Shukla uba dang bat ia ka shuki VC.
U la ong ba kyrmen ba ka jingshimti kam jong i Kong Sungoh yn lah ban pynurlong ia shibun ki mat kiba la sahkut naduh ba ka NEHUTA bad NEHUSA ki la dawa. Shuh shuh u la ong ba mynta haba i la shimti kum ka Acting VC, i la don ia ka iktiar bad i la lah ban pyniaid lut da lade ia ki kam khlem da leit kynjoh ktien na u Shukla uba la shim shuti shipor.
Ka NEHUTA bad NEHUSA lyngba u Bah Lakhon ka pynpaw ba kan ai ia ka jingkyrshan ba pura ia i VC na ka bynta ba in lah ban pynbeit ia ka kynrum kynram jong kane ka University.
U President ka NEHUTA u la kren ruh da ka jingtikna ba kim kwah shuh ba u Shukla un dang wan mushlia ia kane ka kam kaba la sdang ban iaid thymmai mynta “Ngim donkam shuh ia u Shukla hangne, ia ka University yn pyniaid da i Kong katba shah ka por” ong u Bah Lakhon.