Hadien ba ka Durand Cup Organising Committee ka la pyndep ïa ka jingïalang na ka bynta ban pynbeit thymmai ia ka program (Fixtures) na ka bynta ka jingïakhun semi final hynne ka sngi ka 22 Nailar, la rai ba ïa ka jingïakhun semi final ba nyngkong, kata hapdeng ka Shillong Lajong FC bad North East United FC kan long ha ka 26 tarik mynta u bnai ha madan Jawaharlal Nehru stadium Polo Shillong katba ka jingïakhun semi final ba ar kan long ha ka 27 Nailur ha madan VYBK, Kolkata.
Kane ka jingrai jong ka Durand Cup organising committee ka la pynkmen ïa ki nongkyrshan ka Shillong Lajong namar kin ioh ban sakhi ïa ka jingïakhun semi final ba nyngkong ha la ïing.
Ka North East United FC kaba dei ka klob ba la longtrai da u tyngshop ka Bollywood, u John Abraham ka dei ruh ka klob kaba mihkhmat ia ki Jylla kiba don ha Shatei Lam Mihngi (North East) bad ka Meghalaya ka la shah kynthup lang ha kane ka klob kaba heh ha kaba ka don ruh ïa u rangialehkai Khasi, u Redeem Tlang kum shi bynta ban mihkhmat na ka jylla ha kane ka klob na ka bynta ban ïakhun ha ka lympung Indian Super League (ISL).
Hadien ba kane ka klob ka la ïoh ïa ka jingtip ba yn pynïakhun semi final ha Shillong, na ka liang ka Klob North east ka la pynpaw ïa ka jingkmen ban ïoh ïalehkai ha kane ka jylla bad lah ruh ban ong ba ma ki ruh ki ïoh ban ïalehkai ha la ïing. “Ngi kmen na ka bynta ka jingpynïaid jong ka Durand Cup organising committee kiba la jied ban pynïalehkai ïa ngi ki 2 tylli ki klob na kane ka thaiñ Shatei Lam Mihngi ha jaka jong ngi hi. Kane kadei ka kabu kaba khraw ïa ngi baroh 2 tylli ki klob, kata ka North East United FC bad Shillong Lajong FC ban ïoh sakhi ïa kane ka lympung ka ban pynsah kynmaw na ka bynta ban ïakhun bad ïaknieh ban ïoh rung final. Ngi ngeit ba kane ka wanrah ïa ka jingïaid lynti ka ban pynsah kynmaw ruh na ka bynta ki nongkyrshan.
Na ka bynta ka Lajong ka long ka jingkmen hynrei na ka bynta ki nongkyrshan kan long kaba kham jwat ban rai ïano ban kyrshan namar baroh 2 tylli kidei na kane ka thaiñ hynrei kyrmen ba ka klob kaba dei hok, kan ïoh ban jam sha ka final.
Ka Durand organising committee ka la pynskhem ruh ba ka jingïakhun final jong kane ka lympung mynta u snem kan long ha Kolkata ha ka 31 tarik mynta u bnai.