Kawei na ki seng treimon sngewbha ka ‘Khooid Ya ka Wah Myntdu’ kala ïoh bat ïa ki trok bad ka JCB kiba dang khlong maw na ki bynta ka Wah Myntdu ha ka por mynmiet jong ka 18 tarik u Naitung.
Mynta ka sngi na ka liang katei ka kynhun ha ryngkat ki nongïalam ka Synjuk ki Waheh Shnong Jowai, ka Synjuk ki Waheh Shnong Ri Jaiñtia, ki seng bhalang kynthup ïa ka JSM, JSU bad ophis na ka tnad PHE, JMB, DFO Social Forestry, District Urban Planner bad na ka Meghalaya State Pollution Control Board kila pynlong ka jingïalang bad ka ophis u Deputy Commissioner ka West Jaiñtia Hills ha ka jingpynïaid u ma M. Challam (ADM) halor kumno ban wad ki lad ki lynti ban ai ka jingïada ïa ki sawdong sawkun jong ka Wah Myntdu.
Kine ki kynhun hadien ka jingïalang na ka liang u President ka seng u ma Khroo L Pariat ha ka jingkren sha ki lad pahai khubor ula ong hadien jong kane ka jingïalang kila rai ban don noh kawei ka Account kaba la tip kum ka West Jaiñtia District Environment Protection & Restoration Fund (Myntdu) bad ka pisa ba la ïoh lum na kane ka Fund yn pyntreikam ha ka ban pynbha pynmiat ïa ka Wah Myntdu.
La ïathuh ruh ba na ka liang u Contractor uba khlong maw na ka Wah Myntdu ha kine ki sngi ba la dep u ma Friday Hinge ula kular ban ai kum ka Donation sha kane ka Fund ban pynbha pynmiat ïa ka Wah Myntdu lyngba ka Agreement kaba long haduh 5 lak tyngka.
Shuh shuh ula pyntip ba ïa u Shyiap uba don ha ki bynta ka Wah khamtam ha Moopiah yn sa khlong noh ïa u, khnang ba ki bynta ka Wah kin kham jylliew katba ïa ki maw kin neh hi kumba ki long.
Ha kaba ïadei bad u surok naduh jingkieng Treïongriang haduh lad Muphlang ba la dep pyntrei da u ma Ngaitlang Dhar kum u Contractor jong ka Dhar Company, uba la kular hadien ka jingdep ban shna ïa u surok kan don ka jingpynbha pynmiat bad ban pynjyrngam ïa ki sawdong sawkun jong ka Wah Myntdu bad ïa kane kila kyntu ïa u ma Dhar ba un sdang noh ban pyntrei ïa kane kam kaba ula dep kular bad ban ai jingïarap Donation kumjuh sha kane ka Fund.
Na ka liang u President ka Synjuk ki Waheh Shnong Jowai ma Allan Niangti ula ong ha kane ka jingïalang ba la pynlong mynta ka sngi la khang pyrshah ruh ba ym dei shuh ban bret pathar ïa ki ñiut ki nier kiba lah ban poi sha ki bynta ka Wah Myntdu da kaba ong lada lap ïa kiba leh pynshah kin shah pynshitom katkum ki kyndon aiñ.
U President ka Synjuk ki Waheh Shnong Ri Jaiñtia ula ong ba ka Synjuk ka kyrshan pura ïa kane ka seng Khooid Ya ka Wah Myntdu kaba la ïaid lynti haduh mynta ban ïada ïa ka Wah Myntdu, ha ka jingïalang mynta ka sngi ula pyntip ba la khang ïa kino kino kiba leh pyrshah lane bret ñiut sha ki bynta ka Wah.
Katba na ka liang u President ka Jaiñtia Fishing & Environment Protection Association ma D.H. Pde ula ong kum ka seng ka don ka jingkitkhlieh na ka bynta ki dohum kiba im ha ka Wah Myntdu, da ka khang pyrshah ban ym bit ban tong sasi, wieh jar bad pyndonkam da ki dawai kaba la ktah bha ïa ki dohum. Ula kyntu ia ka jaka ba la pynlong kum kawei na ki jaka ri dohkah Sanctuary kaba don ha syntu ksiar, ula kyntu ba dei ban sumar bha ïa ki dohkha, khnang ban kan long ka jingmyntoi kaba khraw bad kaba lah ruh ban khring ïa ki nongwan jngohkai pyrthei.
