U Myntri Rangbah ka Jylla u Conrad K Sangma u la pyntip ba ka sorkar kan ai jingïarap da ka song pisa kaba 3 Klur tyngka sha ki club ïalehkai kynjatbol kiba ïakhun ha ki kyrdan kiba kham shajrong kum ha ka I-League nalor kiwei kiwei. Ia kane u Myntri Rangbah ka Jylla u la pyntip haba kren sha ki nongthoh khubor ha ka janmiet sngi Thohdieng ha JN Stadium, Polo Shillong.
U Myntri Rangbah u la ïathuh ba na ka liang ka sorkar kan ai 2 klur tyngka katba ka 1 klur kan dei lyngba ki nongbei tyngka bad baroh kan long 3 Klur tyngka. U la ong ba kane ka sienjam ba ka sorkar ka la shim ka long ban nang kyntiew shuh shuh ia ka jingïalehkai da kaba sdang shuwa na ka jingïalehkai kynjatbol.
U Myntri Rangbah u la ai khublei ruh ia ka Indian Army kaba la jied ïa ka Nongbah Shillong ban pynlong ia ki jingïalehkai jong ka Durand Cup kaba la sdang naduh mynta ka sngi Thohdieng.