Hadien ba la bna ba ki arjylla Meghalaya bad Assam kin sdang ia ka bynta kaba ar ka jingiapynbeit ia u pud u sam hapdeng ki ar jylla Meghahalaya bad ka Assam kaba iadei bad ka kam Block I, kumba 31 ngut ki Rangbah kiba kynthup ia ki Rangbah shnong na Labang-Nongphyllut, Elaka u Dolloi Nongphyllut bad Pangam Raliang (Block I) ki la wan ia kynduh hynnin ka sngi (25/07/2022) ia u ma Sniawbhalang Dhar, u Myntri sorkar ba dei peit ia ka tnat pynroi sor etc bad uba long ruh u Chairman ka District Regional Committee jong ka jingiapynbeit ia u pud u sam hapdeng ka Jylla Meghalaya bad Assam.
Ha kane ka jingiakynduh na ka liang ki Rangbah ka thain Labang-Nongphyllut bad Pangam Raliang, ki la ban jur ia u Chairman ka District Regional Committee ba ka Elaka Labang-Nongphyllut bad Pangam Raliang ka dei ka bynta ba dei hok jong ka Ri Jaintia naduh hyndai hynthai bad ki Nongshong shnong hapoh kane ka Elaka ki dei ki Nongjaintia (Pnar) bad ha kane ka jingiapynbeit pud hapdeng ka Jylla Meghalaya bad ka Assam, ki Rangbah ki la kyrpad jur ia u Chairman bad ia ka sorkar Meghalaya ba kin kdup ia kane ka thaiñ hapoh u pud u sam jong ka Meghalaya kat kum ka jingiapynbeit bad mynjur lang ki ar District United Khasi & Jaintia Hills bad Mikir Hills kaba la long ha ka snem 1958 ha kaba la mynjur ba ia ka thaiñ Elaka Labang-Nongphyllut bad Pangam Raliang kaba la pyniasoh jubor da ka Sorkar Assam ha ka jingai District ia ka Mikir bad North Cachar Hills ha ka snem 1951 dei ban pynphai biang sha Ri Jaintia kumba ki ju long naduh hyndai hynthai. Ha ka juh ka por ki la kyrpad bad kyntu jur ia u ma Sniawbhalang Dhar ba un sngewbha ban wan jngoh hi dalade ia ki shnong ki thaw kiba don hapoh ka Elaka Labang-Nongphyllut bad Pangam Raliang ha shwa ba kin ia pynbeit ia u pud u sam.
Shuh shuh ha kane ka jingiakynduh ki la pynsngew ha u Chairman, ba ka thain Labang-Nongphyllut bad Pangam-Raliang, ka don la u Dolloi uba peit uba khmih ia ka synshar ka khaddar bad ia ka bha ka miat jong ki Nongshong shnong. La ong ruh ba u Dolloi Nongphyllut, u dei ruh u Dolloi Niam, hynrei la pynduh pyndam ia une u Dolloi da ki bor District jong ka Mikir Hills (Karbi-Anglong ba mynta). Shuh shuh la iathuh ba ka jingbym don u Dolloi, ka ktah ia ka niam ka rukom jong ki Nongshong shnong kiba dingbat triang ia ka niam kaba ai U Blei ha ki Longshwa manshwa (Niam Trae). Na ka liang jong u Chairman (ma Sniawbhalang Dhar) u la kren shai ba na ka liang jong u bad ka Sorkar Meghalaya ki la shim khia ia ka kam bad ha shwa ban ia kren bad ka sorkar Assam, un wan jngoh hi dalade ia ki shnong ki thaw bad ban ia kynduh ia ki paidbah nongshong shnong bad ha shwa ban wan jngoh ia ki shnong ki thaw kiba don hapoh kane ka Elaka un sa khot ia ka meeting kaba kyrpang. U ma Sniawbhalang u ong ruh wat lada ym lah ban pyndep ia kane ka kam hapoh une u snem ba la jan ki elekshon MLA 2023, hynrei la katta ruh ka sorkar ka ban wan hadien ka elekshon 2023 kan sa bteng ban pyndep ia kane ka kam pynkut u ma Sniawbhalang Dhar, Chairman ka District Regional Committee Jaintia Hills District.